Kryeinspektorja Bashari i kërkoi Kuvendit miratimin e një ligji të ri për “Parandalimin e konfliktit të interesit” duke vënë në dukje se ILDKPKI ka pasur vështirësi në zbatimin e ligjit në fuqi.
Ajo i kërkoi komisionit të ligjeve që të merrnin parasysh nevojën për një përmirësim të kuadrit ligjor për parandimin e konfliktit të interesave duke bërë të ditur se ka dorëzuar një draft të ri ligjor në Kuvend.
“Ju ftoj që të merrni masat përkatëse për ta përmirësuar këtë kuadër ligjor, sepse në shumë raporte konsiderohet një ligj i vështirë për tu kuptuar, për tu zbatuar, që nuk ka dhënë efektet e duhura”- u tha ajo deputetëve.
Deputetja Dhurata Çupi e cilësoi “konflikt të pastër interesi” raportimin e Basharit në komision pasi deputetët janë subjekt kontrolli i ILDKPKI.
“Jepni një sugjerim ligjor që të zgjidhet ky konflikt”- tha ajo, duke propozuar që kryeinspektorja të raportonte direkt në seancë plenare.
Po për kryetaren e komisionit, Klotilda Bushka, ky raportim vjetor është në përputhje me ligjet në fuqi dhe praktikat parlamentare. “Është e paevitueshme që një institucion i pavarur apo kushtetuese të mos raportojë në asnjë vend”- tha ajo dhe pse në dukje mund të perceptohej si konflikt interesi.
Kryetari i grupit demokrat Enkelejd Alibeaj i drejtoi Basharit pyetje se çfarë po bën ky institucion për procedimin e magjistratëve që janë larguar nga vetingu, duke e konsideruar këtë si një kusht nga Brukseli për integrimin.
“Inspektoriati nuk e ka në tagrin e tij ligjor që të inicojë një proces pranë organeve ligjzbatuese për magjistratët e shkarkuar nga vetingu”- tha Bashari. Sipas saj kompetenca e institucionit është vetëm ndihmues në procesin e rivlerësimit.
Puna për institucionet e vetingut zinte një pjesë të konsiderueshme në raportin e dorëzuar në Kuvend nga ILDKPKI.
Sipas raportit, ky inspektoriat ka bërë kontroll të plotë për 312 kandidatë në organet e ndryshme të sistemit të drejtësisë.
“ILDKPI angazhoi një pjesë të mirë të kapaciteteve institucionale, kryesisht në trajtimin e më shumë se 155 kërkesave të ardhura nga organet e rivlerësimit duke vendosur në dispozicion dokumentacionin shtesë të kërkuar brenda afateve të përcaktua nga këto organe”- tha Bashari.
Ndërsa lidhur me kontrollin e pasurive, Bashari, tha se janë administruar 4032 deklarata të interesave private dhe i janë nënshtruar kontrollit 802 subjekte, kontroll që ka përfunduar me 16 raste të referuara pranë organeve ligjzbatuese dhe 130 masa administrative me gjobë.
Deputetët ngritën shqetësimin për përballimin e punës nga stafi i ILDKPKI duke pasur parasysh shtimin e kompetencave. Duke argumentuar me ngarkesën dhe specifikën e punës Kryeinspektorja kërkoi nga Kuvendi që trajtimi financiar i inspektorëve të jetë i ngjashëm me nivelin e këshilltarëve të organeve të reja të drejtësisë.
