Të dy seancat paralele të proceseve gjyqësore për të ashtuquajturën “Dosja 184” u shtynë njëra pas tjetrës të mërkurën pas kërkesave të avokatit mbrojtës të të pandehurve Gentian Rumano, për të sjellë raportet e OSBE-ODIHR si provë dhe kohë shtesë për të përgatitur konkluzionet.
Në seancën me të pandehur Hasan Hotin, ish-Administrator i Lurës dhe ish-shefit i Komisariatit të Dibrës, Robert Aga, Rumano kërkoi më shumë kohë për gjetjen e dy raporteve që kishin të bënin me procesin zgjedhor të pjesshëm në vitin 2016-të. “Jam në kërkim të dy raporteve për zgjedhjet e pjesshme të vitit 2016-të, konkretisht një nga misioni i vëzhgimit të OSBE/ODIHR-it dhe një raport tjetër të Policisë së Shtetit, lidhur po me këto zgjedhje. Nuk po i gjejmë. Unë i kam kërkuar personalisht në internet, por jo zyrtarisht që të sillen në formën e provës. Prandaj kërkoj më shumë kohë”, tha Rumano.
Ish-shefi i komisariatit Aga ishte dakord që raportet e kërkuara nga mbrojtja të bëheshin prezent në procesin gjyqësor. Kërkesa u pranua edhe nga prokurori i çështjes, Urim Buci dhe nga gjyqtarja Nertila Kape.
Po këtë të mërkurë u zhvillua edhe procesi i dytë për të njëjtën dosje me të akuzuar ish-drejtorin e Zyrës Arsimore Drini Gjeci, në akuzë për “shpërdorim detyre” dhe “shantazh të zgjedhësve”, dhe Nuri Meda, ish-Administrator i Tominit, që akuzohet për kanosje të zgjedhësve më shumë se njëherë dhe shpërdorim detyre.
Në seancën e së martës gjyqtari, Edvan Veçani bëri me dije fillimisht revokimin e vendimit për caktimin si avokat të pandehurve, Gentjan Sadikun, pasi në seancë ishte kthyer sërish avokati i zgjedhur nga të pandehurit, Gentian Rumano.
Në këtë seancë duhej të paraqiteshin konkluzionet nga mbrojtja. Rumano tha në sallën e gjyqit se për shkak të ngarkesës së kishte pasur në procese të tjera gjyqësore, nuk i kishte sjellë konkluzionet. “Për këtë kërkoj më shumë kohë dhe t’i sjell në seancën e radhës”, tha Rumano.
Gjyqtari, Edvan Veçani e pranoi një kërkesë të tillë të mbrojtjes, por njëkohësisht duke i tërhequr vërejtje Rumanos, që për të disatën herë shtyn leximin e konkluzioneve. “Në këto kushte seancën e radhës duhet që t’i sillni me patjetër konkluzionet”, tha Veçani.
Pretenca në këtë çështje është lexuar në 19 prill, por të tre seancat pas saj janë shtyrë me arsye të ndryshme dhe konkluzionet e mbrojtjes nuk janë lexuar. Prokurori i Dibrës, Urim Buci ka kërkuar dënimin me nga 3 vite burg për të dy të pandehurit, ndërsa tha se në zbatim të gjykimit të shkurtuar për të dy të akuzuarit ky dënim ulej në 2 vjet. Prokurori kërkoi edhe pezullim e dënimit, meqenëse të pandehurit nuk paraqesin rrezikshmëri të theksuar shoqërore – të vendoseshin në provë për një periudhë kohe prej tre vitesh dhe ndalimi për të kryer detyra dhe marrë funskione publike për dy vjet.
Dosja 184, me përgjime që implikojnë disa persona, përfshi të pandehurit e mësipërm, në manipulimin dhe blerjen e votës në zgjedhjet e pjesshme të vitit 2016, u zvarrit mes prokurorive të Dibrës, asaj të Krimeve të Rënda dhe SPAK për gati 5 vjet. Ajo u dërgua në gjykatë në fund të vitit 2020 vetëm për 4 të pandehur dhe në 12 shkurt 2021 Gjykata e Dibrës e kaloi për gjykim, pasi më herët e ndau atë në dy pjesë. Seancat e radhës për të akuzuarit e Dosjes 184 është vendosur më 16 qershor.
