Në plazhin e Durrësit çadrat dhe shezlonet kanë zënë të gjithë gjatësinë e bregdetit.
Megjithëse jemi ende në ditët e para të sezonit veror, bizneset private që duhet të jenë pajisur tashmë me liçensën e shfrytëzimit nuk kanë lënë asnjë hapësirë boshe mes njera tjetrës.
Madje shpesh herë nuk gjen as një shteg kalimi nga lokalet drejt bregut.
Ata që e vuajnë më shumë situatën e krijuar prej vitesh janë banorët e plazhit, të cilëve u duhet të paguajnë faturën ditore të çadrës, njëlloj si turistët.
“Tani jemi mësuar dhe kërkojmë ndonjë zgjidhje me pak para,” thotë Vasilika, një banore e hershme e lagjes plazhit, e cila tani që është pensioniste ka më shumë kohë për të pushuar pranë detit.
Para 10-12 vjetësh, zonja që banon prej 45 vitesh në plazh nuk u ka besuar veshëve, kur një punonjës i ka kërkuar ta largojë çadrën e saj nga territori i plazhit.
Për të pushuar vetëm 250 metra larg shtëpisë së saj, Vasilikës i duhet të paguajë 300-500 lek të rinj në ditë.
Por ajo e ka të pamundur që të shpenzojë rreth 10 mijë lek të rinj në muaj vetëm për çadrën.
“Vij në plazh, pasi duhet të sjell edhe fëmijët e djalit,” shprehet ajo.
Po si ia bën për ti shpëtuar pagesës së kripur?
“Ja, përpiqem të miqësohem me të rinjtë që punësohen pranë çadrave, të cilët mbyllin një sy kur na shohin në plazhin privat,” tha për BIRN zonja Vasilika.
Në fillim të këtij viti Ministria e Turizmit dhe Mjedisit shpalli hartën e bregdetit shqiptar me 1359 parcela plazhi në dispozicion të subjekteve private, hotele e restorante, që kanë biznese në vijën e parë të godinave.
Por, as Ministria dhe as bashkia e Durrësit nuk folën për plazhe publike pa pagesë, në ndihmë të pushuesve me banim në plazh apo kudo qoftë.
Qytetarëve, që paguajnë taksat u duhet të nxjerrin nga xhepi para edhe për pushimin poshtë çadrave private.
Institucionet zyrtare nuk kanë parashikuar asgjë për ta.
“Dy vitet e kaluara, ndoshta për shkak të pandemisë kishte dy plazhe publike edhe në “Hekurudha”, kurse këtë verë duket se do të kruajmë xhepat për çadrat e privatëve,” vijoi Vasilika.
Ndoshta, pamja e qytetit bregdetar, jo vetëm në plazhin tradicional, por edhe pranë pallateve të rinj në Durrës në këtë fillim sezoni, flet më mirë se çdo deklaratë publike.
Nga sektori “Teuta” e deri në “Iliria”, në një gjatësi prej gati 2 km, e po ashtu deri në Currila, sot ka mbetur vetëm një kuadrat i lirë ku mund të ngulësh çadrën tënde personale, diku në “Apollonia”, por askush nuk e di se sa do të zgjasë ky oaz pa pagesë.