Ish-gjyqtarja e Krujës, Enkeleida Hoxha u lirua nga qelia të dielën më 12 qershor, pasi Gjykata e Posaçme e Aeplit për Korrupsionin dhe Krimin e Organizuar konstatoi se kohëzgjatja e masës së sigurisë “arrest në burg” e caktuar ndaj saj për “shpërdorim detyre” dhe “korrupsion”, kishte tejkaluar masën e dënimit. Një ditë më parë, gjykata kishte rrëzuar një kërkese të mëparshme të Hoxhës për shuarjen e masës së sigurisë.
Enkeleida Hoxha gjendej në paraburgim prej 11 shkurtit 2021, kur u arrestua bashkë me 11 persona të tjerë si pjesë të një strukture kriminale që synonte të lironte disa të dënuar që e vuajnë dënimin në burgun e sigurisë së lartë në Fushë-Krujë, kundrejt përfitimeve monetare.
Ajo u dënua më 14 shkurt të këtij viti me 3 vjet burgim, por përfitoi uljen e 1/3 së dënimit për shkak të gjykimit të shkurtuar.
Inspektori i Lartë i Drejtësisë, Artur Metani kishte filluar hetim disiplinor ndaj Hoxhës për shkak të lirimit të dy të dënuarve për krime të rënda. Pas arrestimit të saj për përfshirjen në lirimin e të dënuarve të tjerë, Këshili i Lartë Gjyqësor, KLGJ vendosi më 17 mars që ta largojë nga detyra Enkeleida Hoxhën. Ajo e kundërshtoi vendimarrjen e KLGJ-së në Kolegjin e Posaçëm të Apelimit, KPA, që është tërhequr për të marrë vendim për pretendimet e saj.
Koordinatorja për të drejtën e informimit pranë Gjykatës së Posaçme të Apelit, Enida Demiraj i tha BIRN se të dielën është vendosur të pranohet kërkesa e Hoxhës për konstatimin e shuarjes së masës së sigurisë, ‘arrest në burg’”, të caktuar nga shkalla e parë më 10 shkurt të vitit 2021. E njëjta kërkesë ishte rrëzuar një ditë më parë.
“Të dy vendimet janë marrë nga trupi gjykues i kryesuar nga gjyqtarja Miliana Muça dhe anëtare gjyqtaret Saida Dollani e Igerta Hysi,” tha Demiraj.
Sipas gjyqtares për mediet pranë Gjykatës së Posaçme të Apelit, Saida Dollani, vendimi për konstatimin e shuarjes së masës së sigurimit për Hoxhën është bazuar në nenin 261, pika 1, shkronja “c” të Kodit të Procedurës Penale, ku parashikohet shuarja e masave të sigurimit në rastet “kur kohëzgjatja e paraburgimit të vuajtur është më e madhe se masa e dënimit të caktuar”. Dollani shpjegoi për BIRN se gjykata ka detyrim që një kërkesë të tillë ta shqyrtojë brenda afatit kohor 48 orësh.
Lidhur me kërkesën e parë të rrëzuar të shtunën, gjyqtarja Dollani argumentoi se nga përllogaritja matematikore e vuajtjes së dënimit në paraburgim, ka rezultuar se ishte i njëjtë me kohëzgjatjen e masës së sigurisë. Ndërsa në rastin e kërkesës së dytë po me të njëjtin objekt, të dorëzuar në gjykatë të shtunën, gjykata ka konstatuar se ishte tejkaluar afati dhe ka vendosur shuarjen e masës së sigurisë për Hoxhën.
Gjykata ka gjetur në të njëjtën situatë edhe ish-sekretaren e gjykatës së Krujës, Manuela Mallkuçi e arrestuar si e përfshirë në të njëjtën çështje me Hoxhën. Sipas Dollanit, ka rezultuar se ekzekutimi i masës së sigurisë “arrest në burg” për Mallkuçin është kryer në të njëjtën ditë dhe se të dielën është konstatuar tejkalimi i masës së dënimit të dhënë ndaj saj.
