Gjykata e Posaçme e Shkallës së Parë për Korrupsionin dhe Krimin e Organizuar vendosi të enjten të shpallë fajtorë ish-drejtorin e burgut të Lushnjes dhe tre ish-punonjës të tjerë, të akuzuar për veprat penale të shpërdorimit të detyrës dhe shkeljes së barazisë në dy tendera me vlerë rreth 6.5 milionë lekë.
Me vendimin e saj, Gjykata e Posaçme i konsideroi të papërshtatshme masat e dënimit të kërkuara nga SPAK dhe vendosi t’i rëndojë ato.
Sipas hetimit të SPAK, ish-drejtori i burgut të Lushnjes, Judmir Shurdhi kishte ushtruar presion ndaj vartësve për kualifikimin e operatorëve fitues në dy tendera për shërbim transporti të zhvilluar në vitet 2018 dhe 2019. Gjithashtu, Shurdhi kishte ngarkuar të njëjtët persona që të kryenin edhe rolin e anëtarit të njësisë së prokurimit, edhe atë të komisionit të vlerësimit të ofertave.
Në përfundim të shqyrtimit gjyqësor, prokurorja e çështjes, Enkeleda Millonai kërkoi dënimin përfundimtar të Shurdhit me 4 muaj burgim. Ndërsa mbrojtja e të pandehurit ka kërkuar pafajësi ose pezullim të vendimit me burg.
Trupa gjykuese e përbërë nga Flojera Davidhi, Irena Gjoka dhe Erjon Bani i ka konsideruar të dy kërkesat të padrejta dhe vendosi dënimin e ish-drejtorit të burgut të Lushnjes me 1 vit e 4 muaj burg si dhe heqjen e së drejtës për të ushtruar funksione publike për një afat 5-vjeçar.
Dënime më të ashpra se kërkesa e prokurorisë u dhanë edhe për tre ish-punonjësit e akuzuar, Erjon Çela, Miranda Idrizi dhe Krenar Gozhina.
Për të pandehurin Krenar Gozhina, SPAK kërkoi 4 muaj burgim, ndërsa gjykata vendosi heqje lirie për 1 vit si dhe heqjen e së drejtës për të ushtruar funksione publike për 5 vjet.
Për të pandehurit Miranda Idrizi dhe Erjon Çela është kërkuar nga SPAK dënimi me 3 muaj burgim, ndërsa gjykata ka vendosur dënimin e tyre me nga 6 muaj burgim. Dy të pandehurve Idrizi dhe Çela u është hequr gjithashtu e drejta për ushtrimin e funksioneve publike për 5 vjet.
Për të pandehurën për “moskallzim të krimi”, Xhejsika Kaja prokuroria ka kërkuar dënimin me 2 muaj burgim, ndërsa gjykata ka vendosur përfundimisht 6 muaj heqje lirie. Për Idrizin, Çelën dhe Kajën është pranuar kërkesa për pezullimin e dënimit, me kusht që të mos kryejnë vepër penale për një vit.
