Një javë më parë në shëtitoren bregdetare të Durrësit u rivendosën në një hapësirë publike monumentet në bronz të katër prej këngëtarëve më të njohur të globit në gjininë muzikore të rrokut.
Monumentet e John Lennon, Tina Turner, Mick Jagger dhe Bob Dylan, të cilat janë riinstaluar javën e kaluar në shëtitore, patën më herët një jetë shumë të shkurtër në lulishten pranë portit detar, ku qëndruan deri në vitin 2016.
Të sjella në bronx nga autorët e njohur përkatësisht Qazim Kërtusha, Ilmi Kasemi, Arben Pajo dhe Dylber Neziri, ato u vendosën pranë bustit të Dom Nikoll Kaçorrit dhe morën shpejt pamjen e hijshme të skulpturave urbane edhe pse për to nuk pati as atëherë ndonjë studim paraprak.
Megjithëse u bënë shumë shpejt mjaft të dashur për publikun, veprat u larguan nga lulishtja gjashtë vjet më parë, kur bashkia e Durrësit miratoi projektin e njohur me emrin “Veliera”. Skulpturat u degdisën për më shumë se pesë vjet në oborrin e një ndërmarrjeje bashkiake.
Për gati 6 vjet skulpturat urbane qëndruan larg syve të publikut, por presioni mediatik e shtyu bashkinë e Durrësit në gjetjen e një hapësire të re.
Megjithatë rikthimi i tyre në shëtitoren më të frekuentuar duket se nuk ka kaluar në shkallët institucionale kulturore. Vendosja e tyre në qendër të vendkalimit të turistëve dhe qytetarëve të shumtë nuk duket se është menduar gjatë. Specialistët thonë se vendosja e statujave në shëtitore i bën ato pengesa për kalimin normal të kalimtarëve, ndërsa figurat e famshme duken si të ngrira përballë njëra tjetrës.
Askush nga të katër autorët e monumenteve nuk është pyetur, lidhur me zhvendosjen e veprave të tyre, qoftë edhe për konsulencë.
Asnjë diskutim i këtij lloji nuk është realizuar as në Këshillin Kulturor pranë Bashkisë së Durrës, fuksioni këshillimor i të cilit në këtë rast është anashkaluar. Mbledhja e fundit e këtij Këshilli është zhvilluar në muajin mars të këtij viti.
Ndërkohë edhe disa skulptura të tjera si Dom Nikoll Kaçorri apo ajo e Kolonelit holandez Tomson presin prej vitesh të instalohen në sheshe të Durrësit.
Ndërtimi i Shëtitores tre vjet më parë nuk kishte parashikuar asnjë projekt për krijimin dhe instalimin dhe veç monumenteve të artistëve të rokut, edhe 3-4 skulptura të tjera urbane janë vendosur aty në mënyrë të rastësishme.
Fenomeni i instalimit pa projekt është i pranishëm gjithashtu edhe në veprat e vendosura pranë mureve fortifikuese mesjetare e të ngjashme.
