Një ditë pasi përfaqësues të Mbretërisë së Bashkuar njoftuan se kishin ndërmarrë hapa për të shpallur të padëshiruar përfaqësues politikë shqiptarë të lidhur me krimin e organizuar dhe të përfshirë në korrupsion, ish-kryeministri Sali Berisha pranoi gjatë një konference me gazetarë se ai ishte në atë listë.
Berisha tha të premten se kishte vendosur ta bënte vetë publike masën e marrë ndaj tij, pasi ai kishte qenë “gjithmonë i vërtetë me shqiptarët”. Berisha tha se qeveria e Britanisë së Madhe e kishte cilësuar atë të lidhur me krimin e organizuar dhe të përfshirë në korrupsion, duke veçuar si shembull rastin e biznesmenit kontravers Damir Fazlliç.
Në pjesët e vendimit që u lexuan nga Berisha vihej në dukje se ai akuzohej për “lidhje të qarta me grupe të krimit të organizuar dhe kriminelë, të cilët kanë paraqitur një rrezik për sigurinë publike në Shqipëri dhe në Mbretërinë e Bashkuar dhe se ju jeni i gatshëm t'i përdorni këto lidhje për të avancuar ambiciet tuaja politike”. Po ashtu, Berisha tha se vendimi e akuzonte për korrupsion dhe pasurim të tij dhe rrethit të tij të ngushtë.
Por ish-kryeministri tha se vendimi ishte shpifje, ndërsa akuzoi qeverinë e Mbretërisë së Bashkuar për gënjeshtër.
“Ky vendim është në vazhdën e shpifjeve për interesa të të njëjtit grup, që ka sponsorizuar edhe vendimin e sekretarit Blinken, të bazuar në shpifje dhe lobimin korruptiv të Edi Ramës dhe multimiliardierit George Soros”, tha ish-kryeministri gjatë një takimi të përjavshëm me gazetarë nga selia e Partisë Demokratike. Berisha këmbënguli se ndaj tij nuk kishte prova.
Ai tha se Fazlliç, që shërbeu si këshilltar i Partisë Demokratike në mes të viteve 2000, nuk kishte përfituar nga qeveria e tij. Fazlliç u hetua në vitin 2009 për pastrim parash, por më pas prokuroria e pushoi çështjen.
Një investigim i BIRN i vitit 2014 gjeti se Fazlliç dhe persona familjarë e të afërt me Berishën përfituan miliona nga një proces i dyshimtë shit-blerjesh pronash në Porto Romano në Durrës. Investigimi gjeti se pronat u blenë nga e bija e ish-kryeministrit, Argita Berisha dhe një avokate e lidhur me të dhe iu shitën më pas me gati dyfishin e çmimit biznesmenit boshnjak. Pas këtyre transaksioneve, qeveria e përfshiu zonën në hartën e “parkut energjetik”.
Një ditë më parë, ambasada e Mbretërisë së Bashkuar në Tiranë njoftoi se disa personazhe publike shqiptare me lidhje me krimin e organizuar dhe korrupsionin ishin në listë. Megjithatë, ambasada bëri me dije se nuk do t'i publikonte emrat. “Mbështetja që disa figura publike marrin nga kriminelët në këmbim për korrupsionin e tyre mbyt zërin e shqiptarëve”, thuhet në deklaratën e bërë nga përfaqësuesi i qeverisë Britanike për Ballkanin, Sër Stuart Peach.
Peach theksoi se qëllimi i ndërshkimit është të forcojë demokracinë në Shqipëri duke ndëshkuar kriminelë që blejnë vota apo shantazhojnë zgjedhësit. “Për sa kohë politikanët janë në gjendje të punojnë me kriminelë, për të blerë, shantazhuar dhe frikësuar votuesit, demokracia shqiptare do të mbetet e dobët dhe jo e plotë,” thuhet në deklaratë.
Berisha është shpallur fillimisht “non-grata” nga Departamenti i Shtetit i SHBA në majt të vitit që shkoi. Njëlloj ai e sulmoi vendimin si të lobuar dhe pretendoi se kishte ngritur padi ndaj Sekretarit Amerikan të Shtetit, Antony J. Blinken në një gjykatë në Francë. SHBA-të kanë vendosur në këtë liste edhe figura të tjera, përfshi ish-kryebashkiakun e Durrësit Vangjush Dako si dhe ish-deputetët Tom Doshi dhe Aqif Rakipi.