Organizata Unioni Ndërkombëtar për Mbrojtjen e Natyrës (IUCN), ka përditësuar së fundmi Listën e Kuqe për Speciet e Rrezikuara, listë e cila tashmë përfshin në total 147,517 specie.
Në listën e kuqe të IUCN, rreth 42 mijë specie janë të kërcënuara për zhdukje, midis tyre dhe peshku i llojit blin.
“Kur bëhet fjalë për rajonin tonë, ne do të donim të theksonim si gjetje kryesore faktin që të gjithë speciet e mbijetuara të blinit janë tashmë në rrezik për zhdukje për shkak të pritave dhe gjuetisë së paligjshme”, shkruhet në deklaratën për shtyp të organizatës mjedisore.
Blini është një prej specieve të listuara si e rrezikuar në Listën e Kuqe, specie e cila prej shekujsh peshkohet pa kriter për mishin e këtij peshku dhe haviarin.
Blini njihet për madhësinë e tij, së bashku me Blinin Belugë të rrezikuar në mënyrë kritike (Huso Huso) që rritet deri në tetë metra dhe arrin një peshë deri në 1.700 kilogram.
Në deklaratën për shtyp, Milica Mišković, përfaqësuese e IUCN, u shpreh se rrjeti i Unionit Ndwrkombëtar sapo ka marrë një nismë të re për mbrojtjen e species së blinit, në lumenjtë e Danubit dhe Rionit.
“Rivlerësimi i sotëm vjen si një kujtesë e beftë se kjo specie e lashtë i ka ditët e numëruara”, tha Mišković nga IUCN.
“Programi i IUCN-së ‘Shpëtoni Speciet Tona (Save Our Species)’ sapo ka ndërmarrë një iniciativë të re për ruajtjen e blinit në lumenjtë e Danubit dhe Rionit. Përveç mbështetjes së veprimit për ruajtjen në terren, ne shpresojmë të rrisim ndërgjegjësimin për këtë status alarmues të specieve të mbetura”, shtoi ajo.
Pavarësisht mbrojtjes që ofron ligji ndërkombëtar, gjuetia e paligjshme vijon të ndikojë në më shumë se gjysmën e këtyre specieve.
“Pritat ndikojnë ndaj të gjithë specieve të blinit duke i penguar ato të shtegtojnë në terrenet e të tyre të shumimit, ndërsa ngrohja e lumenjve për shkak të ndryshimeve klimatike ndërpret më tej riprodhimin e blinit”, citohet në deklaratën për shtyp të IUCN-së.
Sipas ekspertëve mjedisorë, zgjidhja e duhur për të siguruar një mbrojtje dhe mbijetesë më afatgjatë të këtij peshku mbetet restaurimi i ekosistemit të ujërave të ëmbla.
“Restaurimi i ekosistemit të ujërave të ëmbla dhe ndërtimi i shtigjeve të efektshme për peshqit, së bashku me rishumimin, janë masat kryesore për të mbështetur mbijetesën afatgjatë të specieve të blinit në botë”, citojnë ekspertët e IUCN në deklaratën për shtyp.
“Këto masa i kanë dhënë provat për efektshmërinë e tyre për specie të tilla si blini i Adriatikut i Rrezikuar në Mënyrë Kritike (Acipenser naccarii)”, përfundon deklarata për shtyp e IUCN.
