Kryeministri Edi Rama njoftoi të hënën lirimin nga detyra të zëvendëskryeministrit Arben Ahmetaj dhe kryenegociatorit të Shqipërisë për anëtarësimin në Bashkimin Europian, Zef Mazi.
Rama gjithashtu njoftoi promovimin e ministres së Energjisë dhe Infrastrukturës, Belinda Balluku në postin e zëvendëskryeministres – të lënë vakant nga Ahmetaj, si dhe të Majlinda Dhukës si ministre Shteti dhe kryenegociatore me BE.
Në një postim në rrejtin social Twitter kryeministri Edi Rama i justifikoi ndryshimet në kabinetin qeveritar me hapjen e procesit të negociatave me BE dhe krizën energjitke me të cilën përballet vendi.
“Tani që prioriteti i Rindërtimit ia le vendin prioritetit të Negociatave me BE, ndërron profili i ministrit të Shtetit,” shkroi Rama, ndërsa shtoi se Majlinda Dhuka ka ‘një profil i lartë teknik’, çfarë sipas kryeministrit do të zëvendësojë ‘profilin e lartë diplomatik’ të ambasadorit Mazi.
“Energjia si sfida më kolosale e kësaj periudhe dhe infrastruktura si sfidë e pandërprerë kombëtare, janë bërë sot edhe marrëdhënie intensive me qeveri e institucione ndërkombëtare,” shtoi Rama, duke shpjeguar promovimin si zëvendëskryesministre të Ballukut.
Që prej janarit 2019, Belinda Balluku shërben si ministre e Infrastrukturës dhe Energjetikës. Përpara se të mbante këtë detyrë ajo ka punuar si drejtore e përgjithshme e Agjencisë Kombëtare të Lundrimit Ajëror, Albcontrol.
Ministrja e re e Shtetit, Majlinda Dhuka prej 8 vitesh punon në Këshillin e Ministrave si Drejtoreshë e Departamentit të Qeverisjes së Mirë.
