Me konsensus politik, mazhoranca dhe opozita vendosën të martën që të shtyjnë me 6 muaj të tjerë afatin e komisionit për Reformën Zgjedhore, pasi komisioni nuk arriti të funksiojë në afatin e parë 6-mujor.
Dy bashkëkryetarët, Damian Gjknuri nga PS dhe Enkelejd Alibeaj nga PD, nuk dhanë arsye për vonesën e gjatë për të nisur nga puna, por u shprehën optimistë se do të arrijnë të realizojnë reformën në afatin e ri.
“Besoj se 6 muaj janë një periudhë e nevojshme dhe e mjaftueshme për të realizuar objektivat që i kemi vënë vetes,” tha Gjiknuri.
Komisioni për reformën zgjedhore u ngrit me vendim të Kuvendit me datë 10 shkurt, por nuk arriti të ketë asnjë produkt real pune në 6 muajt e parë. Gjatë kësaj periudhe u zhvillua vetëm një mbledhje për konstituimin e tij, ku palët shprehën skepticizmin për realizimin e një reformë të gjithpranuar nga politika.
Sipas propozimit Alibeaj-Gjiknuri komisioni do të funksionojë deri më 10 mars 2023, por vendimi zyrtar për shtyrjen do të merret në seancë plenare.
Të martën u miratuan edhe emrat e ekspertëve, të cilët Gjiknuri i ndau në dy përcaktime, teknikë dhe politikë. Por, deputeti Petrit Vasili e kundërshtoi këtë përcaktim, duke kërkuar që ekspertët të quhen teknikë pavarësisht se vijnë si propozime nga partitë politike.
Alibeaj u kërkoi ekspertëve që në planin e punës të kenë prioritet çështje që janë më emergjente dhe që mund të prekin zgjedhjet vendore, të cilat mbahen në gjysmën e parë të vitit që vjen.
Komisioni ka si objektiv realizimin e ndryshimeve të nevojshme ligjore duke u bazuar në rekomandimet e fundit të Prezencës së OSBE-së në Tiranë.
Raporti përfundimtar i monitoruesve të zgjedhjeve të 25 prillit 2021 kritikoi qeverinë e kryeministrit Edi Rama për abuzime me pushtetin gjatë fushatës, ndërsa Partia Demokratike u kritikua për ngritjen e “strukturave paralele” të mbrojtjes së votës. Ky raport i cilësoi të besueshme akuzat për blerje të votës.