Në kryqëzimet dhe sheshet kryesore të Tiranës, grupe të rinjsh me fletë nëpër duar ftojnë prej ditësh qytetarët që të firmosin nismën e një projektligji për hartimin e minimumit jetik në Shqipëri.
Aktivistët e Organizatës Politike kanë mundur të mbledhin më shumë se 3000 firma në pesë ditë të aksioneve të tyre në terren.
“Përcaktimi i minimumit jetik është e drejtë shoqërore themelore, por në Shqipëri ky minimum jetik nuk është i përcaktuar,” thonë aktivistët.
“Ne jemi në çdo zonë të Tiranës, duke filluar prej kryqëzimeve afër qendrës si edhe në zonën e Bërrylit, Ali Demit, Liqenit Artificial dhe do vijojmë për dy muaj të tjerë edhe në qytete të tjera”, tha Klodi Leka, aktivist i Organizatës Politike.
Organizata Politike është një grupim aktivistësh që luftojnë për të drejtat bazike sociale të punëtorëve, studentëve, profesionistëve, pensionistëve, bizneseve të vogla dhe të gjitha shtresave në nevojë.
Aktivistët synojnë të mbledhin 22 mijë firma qytetarësh për ta detyruar Kuvendin e Shqipërisë të marrë në shqyrtim projektligjin e tyre të prezantuar si iniciativë qytetare nëpërmjet përfaqësimit nga komiteti prej 8 personave aktivistë.
“Kemi kërkuar nga KQZ-ja tre muaj kohë për mbledhjen e firmave, por me këtë ritëm që po ecim, mund t'i mbledhim firmat e mjaftueshme edhe për gjysmën e afatit kohor,” tha për BIRN Arlind Qori.
Sipas aktivistëve të Organizatës Politike, ky projektligj ka si qëllim të zbusë varfërinë dhe përjashtimin social për individët dhe familjet në nevojë, dhe kategoritë e tjera përfituese të skemave të asistencës sociale.
Teksa mblidhen rreth stendave të aktivistëve, qytetarët i përgëzojnë për nismën, por njëkohësisht nuk ngurrojnë të shprehin ankesat e shumta për problemet e tyre jetike për të cilat e kanë humbur shpresën se do të gjejnë diku zgjidhje.
“Asnjë forcë politike nuk na ka dëgjuar deri më sot. Kjo është nismë e mirë, por dyshoj se do merret parasysh”, thotë një grua rreth të pesëdhjetave, e cila ngurron të japë firmën e saj.
Më të interesuarit duket se janë pensionistët, të cilët preken drejtpërdrejt nga mungesa e minimumit jetik.
“Pensionistët e shohin më me interes nismën. Por edhe të rinjtë duan të përfshihen. Një pjesë e mirë e njerëzve që ndalojnë duan të bëjnë diçka të mirë për vendin e tyre dhe për familjet e tyre,” shtoi Qori.
Sipas Klodi Lekës, ka rreth 170 mijë pensionistë të cilët marrin një pension deri në 15 mijë lekë të reja në muaj dhe kjo nismë do u vinte së pari në ndihmë atyre, por edhe shtresave të tjera vulnerabël.
“Kemi parë shumë solidaritet nga shtresa e mesme. Ata janë të gatshëm të ndihmojnë edhe nëse nuk janë personalisht në nevojë,” tha Leka.
Mirela Ruko, një tjetër aktiviste, i tha BIRN se kjo nismë ka një kosto të lartë për qeverinë, faktor ky që mbase do i shtynte ata që të mos e marrin seriozisht miratimin e projektligjit.
“Kjo ka kosto, sepse duhet të llogaritet minimumi jetik, që do i jepet kujtdo që deri më sot ka jetuar me të ardhura nën ato minimalet,” tha Ruko.
Pavarësisht vështirësive dhe pengesave, aktivistët shprehen të vendosur për të arritur qëllimin e tyre për mbledhjen e firmave.
“Shoqëria jonë ka arritur një nivel të frikshëm fatalizmi prej situatave dhe vështirësive ekonomike që po jetojmë,” tha Leka, duke besuar se tashmë është koha për ta ndryshuar këtë gjë.