Dhjetëra policë organizuan një aksion të gjerë në resortin malor të Brezovicës të martën, duke sekuestruar ndërtesa që dyshohet se janë ndërtuar ilegalisht brenda Parkut Kombëtar të Maleve të Sharrit.
Rreth 100 ndërtesa, duke përfshirë më shumë se 80 vila, u bllokuan nga policia e shoqëruar nga prokurori i Ferizajt, Rasim Maloku.
“Operacioni po shkon mirë. Po bëjmë identifikimin e vilave dhe po bëjmë paralajmërime se qasja në to tani është e ndaluar deri në një vendim të formës së prerë nga gjykata”, tha Maloku.
Në dhjetor të vitit të kaluar, ish-kryetari i komunës së Shtërpcës, Bratislav Nikolic, drejtues komunalë dhe drejtuesit e e kompanive private u arrestuan në një bastisje tjetër mbi pretendimet për ndërtime të paligjshme në resortin malor.
Në total, rreth 30 persona janë arrestuar në operacionet e deritanishme lidhur me rastin.
Maloku tha se pret që të ngrihen më shumë akuza.
“Po hartojmë një aktakuzë të dytë. Besoj se deri në fund të vitit do të kemi edhe një aktakuzë të tretë. Hetimi do të vazhdojë edhe në vitin 2023 sepse është një rast i madh dhe nuk kemi mundur të përfshijmë gjithçka në një aktakuzë të vetme”, shtoi ai.
Maloku shpjegoi se ligji që rregullon Parkun Kombëtar të Maleve të Sharrit “në mënyrë eksplicite ndalon ndërtimin e atyre objekteve në këtë zonë”.
Në një komunikatë për mediat të martën, Prokuroria Themelore e Ferizajt tha se beson se rreth 100 objekte janë ndërtuar në kundërshtim me ligjin.
Ajo tha se ndërtimi i tyre është mundësuar nga shpërdorimi i detyrës publike, dhënia e lejeve të ndërtimit në kundërshtim me ligjet që rregullojnë parkun kombëtar dhe dhënia dhe marrja e ryshfeteve.
“Nëpërmjet këtyre veprimeve, ata kanë degraduar mjedisin në këtë zonë”, tha prokuroria.
Në periudhën e pasluftës së Kosovës, në Brezovicë janë ndërtuar shumë vila, disa prej të cilave supozohet se i përkasin figurave politike dhe zyrtarëve të tjerë publikë dhe disa prej të cilave kanë pronësi të paqartë.
BIRN ka mësuar se vilat që i përkasin politikanëve mund të jenë objektivi i hetimeve të prokurorisë për këtë rast.
