Gjykata e Posaçme e Apelit për Korrupsionin dhe Krimin e Organizuar njoftoi të martën më 11 tetor ndryshimin e vendimarrjes së shkallës së parë lidhur me masën e dënimit të ish-drejtuesit të Prokurorisë së Kukësit, Edmond Karriqi, i akuzuar për “korrupsion pasiv” dhe ka vendosur që ai ta vuajë dënimin në qeli.
Gjykata e Posaçme e Shkallës së Parë vendosi më 6 maj 2022 të dënojë me 2 vjet burgim prokurorin Karriqi, që u akuzua nga SPAK për marrje rryshfeti në këmbim të lehtësimit të disa personave nën hetim. Ndërsa Gjykata e Apelit njoftoi se i ka shtuar 4 muaj burgim dënimit të tij si dhe ka vendosur që ish-prokurori ta vuajë dënimin në një burg të sigurisë së zakonshme.
Bashkë me Karriqin, u arrestuan më 30 qershor 2021 edhe tre persona të tjerë, Dritan Dedja, Emirjan Beu dhe Isuf Gega, të akuzuar për “korrupsion aktiv” dhe “ushtrim ndikimi të paligjshëm”. Këta tre të fundit u dënuan me nga 1 vit e 4 muaj burgim.
Gjykata e Posaçme e Apelit njoftoi se ka lënë në fuqi vendimin e shkallës së parë lidhur me kualifikimin ligjor të veprave penale, fajësinë dhe masën e dënimit për tre të pandehurit e tjerë.
