Gjykata e Lartë njoftoi të premten riçeljen e procedurës së pranimit të kandidaturave për një vend vakant në Gjykatën Kushtetuese, me qëllim zëvendësimin e gjyqtares Vitore Tusha, mandati të cilës në këtë funksion ka përfunduar që në mars të vitit 2017. Në njoftim sqarohet se njoftimi për plotësimin e kësaj vakance është shpallur më parë në datat 16 janar 2017; 19 prill 2019; më 3 qershor 2021 dhe më 31 janar të vitit 2022.
“Për shkak të numrit të pamjaftueshëm të kandidatëve Këshilli i Emërimeve në Drejtësi nuk ka përfunduar procedurat e vlerësimit dhe të renditjes së kandidatëve nga ana e Këshillit të Emërimeve në Drejtësi”, citohet në njoftim dhe sqarohet se KED ka vendosur në dijeni Zëvedëskryetarin e Gjykatës së Lartë, Sokol Sadushi, se në garë për plotësimin e kësaj vakance kanë mbetur vetëm dy kandidatë.
KED vlerëson se nevoja për rishpalljen e kandidimit është “në respektim të parimit të konkurrencës së përzgjedhjes së më të mirit”. Ashtu si KED, Mbledhja e Përgjithshme e Gjyqtarëve të Gjykatës së Lartë e ka çmuar të nevojshme rishpalljen e thirrjes për plotësimin e vendit vakant të Tushes, për pjesën e mbetur të mandatit 9-vjeçar, që përfundon në muajin mars 2025.
Afati i pranimit të kërkesave të kandidatëve është 30 ditë nga data e publikimit të njoftimit ku janë pasqyruar edhe kushtet dhe kriteret që duhet të vërtetojnë se plotësojnë.
Dy kandidatet aktuale në garë për vendin vakant të Tushes janë prokurorja e Tiranës, Elsa Miha dhe avokatja Holta Zaçaj.
Ndërkohë, KED njoftoi më 14 tetor se në mbledhjen e radhës të zhvilluar po në atë datë, kishte konkluduar lejimin e kandidimit për nga një pozicion në Gjykatën Kushtetuese, të gjyqtarit të Gjykatës Administrative të Apelit, Ardian Dvorani dhe të ish-kryetarit të Këshillit të Lartë të Prokurorisë, KLP, Gent Ibrahimi. Dvorani kandidon për vendin vakant në Gjykatën Kushtetuese të mbajtur më parë nga Altin Binaj, ku së bashku kandidojnë dhe Gent Ibrahimi, Elsa Miha, Marjana Semini dhe Arta Vorpsi. Për pozcionin tjetër Ibrahimi është në garë me Arta Markun dhe Arta Vorpsion.