Anëtarët e komisionit dhe ekspertët e tjerë pretenduan se nuk ishin bërë pjesë e hartimit të propozimeve të depozituara pasi drafti i ekspertit të PD-së, Indrit Sefa, ishte shpërndarë me email vetëm 2 orë para mbledhjes, ndërsa një dokument tjetër i përgatitur nga Viktor Gumi i PS-së ishte dërguar të shtunën.
Deputetët e opozitës që përfaqësonin partitë e vogla në komision akuzuan bashkëkryetarin e komisionit Enkelejd Alibeaj se nuk kishte marrë mendimin e ekspertëve të tyre për draftin.
Kreu i Partisë Republikane Fatmir Mediu tha se drafti duhej të ishte konsultuar me ekspertët e tjerë të zgjedhur nga komisioni dhe kërkoi kohë për tu njohur me propozimet. Ai akuzoi dy bashkëkryetarët se po e kthenin komisionin në një angazhim personal, jo në diskutim të hapur gjithpërfshirës.
“Nuk ka nevojë për komision, ka nevojë vetëm për ju të dy, nuk ka funksionuar ndonjëherë kështu ky komision, ka pasur debat dhe zgjidhje në komision”- tha ai.
Deputeti i Partisë së Lirisë Petrit Vasili po ashtu e cilësoi draftin të njëanshëm dhe kërkoi që ekspertët të mos diferencoheshin në punën e tyre.
“Ju keni kokëfortësinë, keni dhe votat, dhe e përdorni si të doni”- tha ai duke kërkuar që para se të kalohet në diskutimet për ndryshimet e kodit, tu jepet mundësia ekspertëve të mblidhen si grup dhe të gjejnë pikat e përbashkëta dhe diferencimet.
Skeptik u shpreh dhe Oerd Bylykbashi, deputet i PD-së, i cili vuri në pikpyetje ligjshmërinë e vetë komisionit në raport me afatet zgjedhore të zgjedhjeve të ardhshme vendore.
“Është e paprecedentë në kushte normale me këtë që po ndodh në këtë komision, po bëjmë ndryshime 5 muaj e gjysëm para zgjedhjeve”- tha ai, duke u kujtuar kolegëve se siguria juridike e kërkon që të mos ndryshohen rregullat kur procesi ka nisur.
“Futja e procesit në një jostabilitet të këtij lloji vë në pikpyetje punën e organeve që do i zbatojnë dhe të drejtat e subjekteve zgjedhore”- shtoi duke shtuar se të gjithë modalitetet e funksionimit të këtij komisioni janë problem.
Edhe bashkëkryetari socialist, Damian Gjiknuri, tha se komisioni dhe ekspertët duhej të njiheshin më parë me draftin e PD-së para se të futej për diskutim. Ndërkojë ai njoftoi se edhe eksperti i PS-së, Viktor Gumi ka sjellë një draft i cili është shpërndarë më herët tek grupi i punës dhe sipas tij nuk ka pasur vërejtje.
Por Alibeaj tha se nuk ka pse të bëhet lojë politike me punën e ekspertëve dhe pretendoi se ekspertët e partive të tjera “nuk kanë bërë detyrat e shtëpisë”.
Pas debatesh dy bashkëkryetarët vendosën që ekspertët e tyre të prezantonin propozimet për ndryshimet në Kod dhe komisioni mori kohë për të debatuar për këto drafte.
Komisioni i ngritur në fillim të shkurtit, për të reflektuar në Kod rekomandimet e Misionit Vëzhgues të OSBE-ODIHR-it, nuk arriti dot të kishte një produkt pune deri në shtator.
Raporti përfundimtar i monitoruesve të zgjedhjeve të 25 prillit 2021 kritikoi qeverinë e kryeministrit Edi Rama për abuzime me pushtetin gjatë fushatës, ndërsa Partia Demokratike u kritikua për ngritjen e “strukturave paralele” të mbrojtjes së votës. Ky raport i cilësoi të besueshme akuzat për blerje të votës.
