Prokuroria e Përgjithshme njoftoi të martën më 1 nëntor 2022 konfiskimin e disa pronave në qytetin e Durrësit, që dyshohet se kanë prejardhje nga veprimtari kriminale. Në njoftimin e prokurorisë thuhet se Gjykata e Durrësit ka vendosur të pranojë kërkesën e prokurorisë për konfiskimin e një pallati, të një hoteli dhe një bari në vendin e quajtur Plazh Durrës, në pronësi të shtetasit P.T. – pasuri që në total kapin vlerën 1 milion euro.
Sipas organit të akuzës, në përfundim të gjykimit ka rezultuar e provuar se kanë egzistuar kushtet ligjore për konfiskimin e këtyre pasurive, pasi është provuar se shtetasi P.T. është i përfshirë në veprimtari kriminale të “pastrimit i produkteve të veprës penale”; “trafikim të narkotikëve”; “shfrytëzim të prostitucionit” dhe “prodhimi dhe mbajtje pa leje të armëve të zjarrit”, vepra penale për të cilat është dënuar.
Në njoftim sqarohet se, nga hetimi dhe shqyrtimi gjyqësor ka rezultuar se shtetasi P.T. i zotëron drejtpërsëdrejti në emër të tij pasuritë që janë konfiskuar. Po ashtu, ka rezultuar se vlera e pasurive nuk i përshtatet nivelit të të ardhurave, si dhe nuk i përgjigjen ndonjë aktiviteti të ligjshëm apo të konfirmuar të të dënuarit P.T..
Duke konsideruar se ky shtetas përfshihet në rrethin e subjekteve, pasuritë e të cilëve verifikohen në kuadër të Ligjit Antimafia, Prokuroria e Durrësit ka kërkuar konfiskimin e tyre, kërkesë që është vlerësuar e drejtë nga gjykata respektive.
