Zëvendësminitrja e Infrastrukturës, Enkelejda Muçaj, tha se kjo shumë do të përdoret për ndërtimin e 6 për qind të punimeve të mbetura.
Në prezantimin e projektligjit, Muçaj tha se ky projekt është i vjetër dhe ka hasur probleme teknike në realizimin e tij, por huaja e re parashikonte t’i jepte zgjidhje përfundimtare ndërtimit të kësaj rruge, që është vetëm 43 kilometra e gjatë.
Ajo pranoi që ndërtimi i rrugës ka zgjatur tej afateve dhe buxheteve të parashikuara, por për këtë ia vuri përgjegjësinë projektit fillestar të miratuar nga qeveria “Berisha”, i cili nuk kishte marrë parasysh lidhjet me rrugët dytësore dhe problemet me terrenin e vështirë të punimeve.
E pyetur nga deputetët e opozitës për koston totale të rrugës ajo tha se vlera e një kilometri përllogaritet 6 milionë dollarë, por se shifra e lartë duhej kuptuar në kontekstin e vështirësive të terrenit dhe veprave që do të ndërtoheshin.
Deputetja Dhurata Çupi tha se marrja e kredive njëra pas tjetrës ishte vetëm një mënyrë e qeverisë për të vjedhur. “Ju thatë kemi marrë 150 milionë euro nga viti 2015, tani po merrni 58 mln euro të tjera për vetëm 6 përqind të punimeve?”- pyeti ajo përfaqësuesit e ministrisë.
“Sa herë kërkohen miliona euro këtu hidhen gurë drejt Autoritetit Rrugor dhe specialistëve që kanë bërë projektin, ndërkohë që projekti fillestar ishte parashikuar të ndërtohej nga buxheti i shtetit dhe ju e ktheni kthyer me kredi e hua”- tha Çupi.
“Me prokurimet e buxhetit e keni vështirë të vidhni kaq lehtë sa me kreditë”- akuzoi ajo përfaqësuesen e qeverisë.
Deputetët e mazhorancës mbrojtën marrëveshjen e re të financimit të kësaj rruge duke e cilësuar me rëndësi përmbylljen e saj pavarësisht kostove financiare.
Në relacionin që shoqëronte këtë marrëveshje thuhet se punimet për projektin “Ndërtimi i seksionit rrugor Qukës-Qafë Plloçë, segmentet 1 dhe 2”, kanë filluar në korrik 2015 dhe referuar vlerave të kontraktuara sipas financimit ekzistues, punimet e projektit janë realizuar fizikisht në total në vlerën 99.4%.
Punimet për ndërtimin e kësaj rruge nisën me forcat e buxhetit të shtetit në vitin 2009 dhe përparuan për 2.9 kilometra para se një konsorcium kreditorësh, përfshirë Bankën Islamike për Zhvillim, Fondin Opek, Fondin Abu Dhabi dhe Fondin Saudit, i erdhën në ndihmë për të financuar pjesën tjetër të rrugës.
Punimet realisht nisën në vitin 2013, por ndryshimet në projektin e rrugës, të ndërmarra nga qeveria e re, e rritën menjëherë koston me 25 milionë dollarë të tjera, të cilat u siguruan me një kredi të dytë nga sauditët në vitin 2014.
Punimet duhej të kishin përfunduar sipas kontratës rreth vitit 2018, por tre vjet pas tejkalimit të afatit, rruga nuk është ndërtuar dhe në janar të këtij viti iu shtuan edhe 48 milionë dollarë të tjera hua nga me Fondin Saudit për Zhvillim, një agjenci e Mbretërisë Saudite që jep kredi zhvillimi nëpër vende të ndryshme të botës.
Muçaj pretendoi në komision se financimi i ri prej 56.8 milionë i miratuar nga qeveria në tetor të këtij viti i jepte fund këtij projekti.
“Financimi shtesë mundëson përfundimin e plotë të projektit dhe vënien e tij në shfrytëzim, të kompletuar me elementet e nevojshme të sigurisë dhe operimit, sipas standardeve”- thuhet në relacion.
