Gjykata e Posaçme e Apelit për Korrupsionin dhe Krimin e Organizuar vendosi të hënën më 14 nëntor të lërë në fuqi vendimin e shkallës së parë për konfiskimin e pasurive të një shtetasi të dënuar në Itali për veprat penale “organizatë kriminale; “shfrytëzim të prostitucionit” dhe “trafikim të lëndëve narkotike”. Vendimi u njoftua nga Prokuroria e Posaçme, e cila sqaroi se pasuritë e Roland (Taulant) Domit dhe personave të lidhur me të janë konfiskuar.
Vendimi final i konfiskimit është marrë ndaj nëntë pasurive të paluajtshme dhe dy të luajtshme.
Konkretisht janë konfiskuar një parcelë toke 3300 m2 dhe një truall me sipërfaqe 234 m2 + ndërtesë 82 m2 në Xhafzotaj të Durrësit; tre njësi shërbimi dhe një ndërtesë me sipërfaqe 128 m2 në Durrës; dy parcela tokë – arë në Marikaj të Tiranës me sipërfaqe totale rreth 2888 m2 – pasuri këto të gjitha në pronësi të Roland (Taulant) Domi. Po ashtu, janë konfiskuar edhe pasuritë në emër të dy familjarëve të tij, një apartament në Kryemëdhenj të Kavajës dhe dy automjete, një i markës “Daimler Chrysler” dhe tjetri “Chrysler Voyager”.