Seanca e fundit plenare e Kuvendit për vitin 2022 nuk arriti shumicën e cilësuar të votave për anëtarin e ri të Gjykatës Kushtetuese, për të cilin kandidonin Marjana Semini, Ardian Dvorani dhe Arta Vorpsi.
Asnjë prej kandidatëve nuk mori 84 votat e mjaftueshme, ndaj automatikisht anëtare e Kushtetueses u bë Marjana Semini, kandidatja e listuar e para në pikëzimin e Këshillit të Emërimeve në Drejtësi.
Seanca u braktis nga deputetët e opozitës dhe rezultatet e votimit të fshehtë treguan se votat e deputetëve socialistë ishin ndarë mes Seminit, 58 vota, Dvoranit, 14 vota dhe Vorpsit, 2 vota.
Kryetarja e Komisionit të Ligjeve, Klotilda Bushka, që drejtonte komitetin e votimit, tha se “në qoftë se asnjë kandidat i përzgjedhur nga KED nuk merr 84 vota, kandidati i renditur i pari nga KED zgjidhet anëtar i Kushtetueses”.
Votimi i listës së kandidatëve u parapri nga debate të forta mes opozitës dhe mazhorancës.
Deputeti Gazment Bardhi akuzoi kreun e grupit parlamentar të PS-së, Taulant Balla dhe kryeministrin Edi Rama, se kishin tentuar të intimidonin deputetë të opozitës për të dhënë votën për kandidatin Ardian Dvorani.
PD-ja kërkoi që votimet e fshehta të beheshin në kohë të ndryshme dhe me fletë të ndara për të mos krijuar mundësinë që të “rridhnin” votat nga radhët e opozitës.
“Shndërrimi i procesit të përzgjedhjes së anëtarit të GJK në një proces mafioz e korruptiv, akti më i rëndë që i bëhet demokracisë,”tha Bardhi. Sipas tij, Rama po tentonte të kthente këtë gjykatë në një seksion të Partisë Socialiste.
Mazhoranca i cilësoi këto akuza të pabaza. Kryeministri tha se nuk kishte asnjë vendim politik të PS-së për votimin e anëtarit të ri të Gjykatës Kushtetuese.
Në seancën 2 ditore, Kuvendi nuk arriti të zgjedhë Avokatin e ri të Popullit edhe pse procesi i nisur që në mars u shty disa herë në tentativë për të gjetur një konsensus mes palëve.
Dy kandidatët e opozitës që u hodhën në votim, Ledion Braho dhe Altin Goxhaj, u votuan kundër nga mazhoranca.
Gara për Avokatin e Popullit afroi një numër të madh kandidatësh dhe para se të niste seanca plenare 11 prej tyre ishin mbështetur me firmat e nevojshme të deputetëve për t'u futur në votim, por një vendim politik i dy grupimeve brenda opozitës bëri që të tërhiqeshin emrat e tjerë.
Mazhoranca e kishte deklaruar më herët se do t'i qëndronte traditës së mëparshme të zgjedhjes me konsensus politik të drejtuesit të këtij institucioni të pavarur duke ia lënë opozitës propozimet e emrave.
Por në seancë, kreu i grupit socialist, Taulant Balla, tha se vendimi politik ishte kundër të dy emrave të ardhur për votim.
“Nuk mund të votojmë një avokat të Partisë Demokratike,” tha ai duke iu referuar Brahos, ndërsa për Goxhajn tha se arsyeja e kundërshtimit ishte firma e Sali Berishës në mbështetje të tij.
Në këtë seancë mazhoranca miratoi disa projektvendime dhe projektligje që kërkonin shumicë të thjeshtë votash.
Po ashtu votoi dhe zgjodhi kryetaren e Autoritetit të Dosjeve, duke i dhënë një mandat të dytë Gentiana Sulës si dhe zgjodhi Erjola Sadushin anëtare të Bordit të Entit Rregullator te Energjisë Elektrike.
