Policia e Shtetit njoftoi të shtunën se kishte arrestuar ekuipazhet shqiptare të 2 anijeve të peshkimit dhe të një anijeje libaneze, që po i furnizonte motopeshkatoret me naftë që dyshohet se do të kontrabandohej në tregun vendas.
Autoritetet sekuestruan rreth 62 mijë litra naftë të kontrabanduar, me origjinë nga Libia dhe 2 motopeshkatoret shqiptare. Në dy ditët që lamë pas policia arrestoi 13 persona, 10 prej të cilëve shtetas të huaj.
Nga ekuipazhi i anijes “Geni” u arrestuan më 12 janar, Elton Qevani, 31 vjeç, Klajdi Kapxhiu, 30 vjeç, Selim Gaba, 65 vjeç, të tre banues në Durrës dhe Muhamet Eltawargy, 50 vjeç, shtetas i huaj.
Ata akuzohen për veprat penale “Kontrabanda me mallra për të cilat paguhet akcizë”, “Fshehja e të ardhurave”, “Ruajtja ose depozitimi i mallrave kontrabandë”, “Kontrabanda e kapitenit, pilotit ose ekuipazhit” dhe “Pastrimi i produkteve të veprës penale ose veprimtarisë kriminale”.
Ndërsa nga ekuipazhi i anijes libaneze “Abobakr 124”, më 13 janar u arrestuan 9 persona, Muhamed Arafe, Ahmed Zantawi, Ahmet Abdurrabu, Said Nwegi, Muhamed Mahmut, Eshref Kahlife, Islam Ashkar, Ali Hadad dhe Adil Badawi.
Ata akuzohen për veprat penale “Kontrabanda me mallra për të cilat paguhet akcizë”, “Ruajtja ose depozitimi i mallrave kontrabande” dhe “Kontrabanda e kapitenit, pilotit ose ekuipazhit”.
Drejtori i Departamentit për Kufirin dhe Migracionin në Policinë e Shtetit, Saimr Boshnjaku, sqaroi në një deklaratë për mediat se operacioni u zhvillua në det të hapur me ndihmën e avionëve të “Guardia di Finanza”, që filmuan transportin e naftës nga anija libaneze tek motopeshkatoret.
Në një operacion të ngjashëm në det më 13 shtator 2022 roja regdetare në Durrës bllokoi anijen cisternë “Queen Majeda” dhe arrestoi katër anëtarë të ekuipazhit të saj, të dyshuar se kishin futur në Shqipëri 2275 ton naftë kontrabandë, e cila në treg kapte vlerën 2.2 milionë dollarë. Ajo ishte nisur nga Porti i Benghazit në Libi.
Këto raste shënojnë rikthimin e dokumentuar të kontrabandimit të naftës përmes mjeteve lundruese, që pas rritjes së çmimit të karburanteve vitin e kaluar si rrjedhojë e konfliktit ushtarak midis Rusisë dhe Ukrainës dhe inflacionit.
Një vit më parë, më 23 korrik policia finalizoi operacionin e parë të quajtur “Diesel”, gjatë të cilit u ndalua në det një motopeshkatore në të cilën ishin kamufluar në ambiente të përshtatura 80.000 litra naftë që synohej të kontrabandohej.
Ndërsa më 7 shtator në një tjetër operacion të koduar “Diesel 2”, policia ndaloi gjatë lundrimit një motopeshkatore në të cilën gjeti rreth 25.000 litra naftë pa dokumentacion, që dyshohet se do të kontrabandohej në tregun vendas dhe arrestoi 2 vëllezër nga Kavaja, 43 vjeçarin me iniciale Sh. C. dhe 41 vjeçarin me iniciale R. C.
