Duke folur pas një mbledhje të grupit ku sipas tij ishin vendosur prioritetet e punës për sesionin e ri 6-mujor të Kuvendit, Balla, shprehu bindjen se amnistia fiskale do të merrte votat që i duhen nga segmente të caktuara të opozitës.
“Kuvendi i ka votat për të miratuar çdo ligj, unë nuk mendoj që është korrekte që të shprehem sot se deputetet e opozitës nuk e kanë lexuar ligjin për amnistinë fiskale.”- tha ai duke shtuar se “e rëndësishme që do të miratohet në këtë sesion”.
Balla tha se mazhoranca do të negocionte me opozitën për të siguruar votat duke e lidhur votimin e kësaj nisme me zgjedhjen e Avokatit të Popullit, pasi në të dy rastet duhen 84 vota.
“Avokati i Popullit kërkon 84 vota. As ne nuk i kemi votat për ta zgjedhur e sikurse do dialogojmë për të siguruar mbështetjen për ligjin për Amistinë Fiskale e njëjta duhet të ndodhë dhe nga krahu tjetër për të siguruar votat për Avokatin e Popullit”, u shpreh ai.
Si praktikë parlamentare për balancim pushtetesh propozimi i emrit për Avokatin e Popullit i është lënë opozitës, por PS rrëzoi kandidaturat e sjellë nga PD-ja në seancën e fundit të sesionit të shkuar parlamentar.
Nisma për “Amnistinë fiskale” u rikthye për herë të dytë në objektivat e qeverisë pasi u tërhoq në vitin 2020 nga kritikat e organizmave ndërkombëtarë dhe institucioneve financiare si një projekt që do të hapte rrugë pastrimit të parave.
Por këtë herë mazhoranca po këmbëngul që ta fusë në axhendën parlamentare pavarëisht kundërshtimit të hapur nga Bashkimi Europian e shtete të tjera partnere si SHBA-të dhe Britania e Madhe.
Projekti është kundërshtuar publikisht edhe nga përfaqësues të opozitës si një tentativë për legalizimin e parave të krimit dhe korrupsionit.
Projekti i qeverisë parashikon që përkundrejt një tatimi nga 5 deri në 10% të pasurisë së vënë përmes kontrabandës apo evazionit fiskal, shtetasit shqiptarë apo të huajt me rezidencë fiskale në Shqipëri do të kenë mundësinë të deklarojnë deri në 2 milionë euro për familje dhe t’i shpëtojnë përgjithmonë përgjegjësisë penale apo administrative për krimet e kryera, përfshirë evazionin fiskal, mashtrimin me TVSH-në apo kontrabandën me mallrat e akcizës.
