Gjykata e Posaçme e Shkallës së Parë për Korrupsionin dhe Krimin e Organizuar çeli të hënën më 16 janar 2023 shqyrtimin e çështjes lidhur me kërkesën e prokurorisë respektive për të gjykuar ish-anëtarin e Gjykatës Kushtetuese, Fatos Lulo, të akuzuar për fshehje të pasurive. Çështja po gjykohet nga gjyqtarja Elsa Ulliri, e cila pasi dëgjoi kërkimet e Prokurorisë së Posaçme Kundër Korrupsionit dhe Krimit të Organizuar, SPAK vendosi të shtyjë seancën për më datë 30 janar në orën 11:00, për t’i dhënë kohë mbrojtësit ligjor të Lulos që të përgatisë dhe paraqesë parashtrimet.
Në maj të vitit 2020, SPAK regjistroi procedim penal ndaj ish-gjyqtarëve të Gjykatës Kushtetuese, Fatos Lulo e Bashkim Dedja, si dhe ndaj ish-gjyqtarit të Gjykatës së Lartë, Shkëlzen Selimi, për veprën penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”. Kodi penal parashikon dënimin me gjobë ose burgim deri në tre vjet për këtë vepër penale.
Sipas SPAK, nga hetimi penal i kryer kanë rezultuar të dhëna se këto subjekte kishin në pronësi pasuri të paluajtshme, të cilat nuk i justifikonin me burime të ligjshme, apo pasuri që i kanë fshehur. Për këtë arsye, u kërkua sekuestrimi i pasurive të tyre.
SPAK njoftoi në mars të vitit 2021 se Gjykata e Posaçme e Shkallës së Parë kishte pranuar kërkesën për vendosjen e sekuestros mbi pasurinë në zotërim të ish-gjyqtarit Lulo, konkretisht të një njësie me sipërfaqe 172 m2 në “Rrugën e Durrësit” në Tiranë.
Ish-anëtari i Gjykatës Kushtetuese, Fatos Lulo ishte i pari që iu nënshtrua procesit të vetingut dhe gjithashtu i pari që humbi vendin e punës për shkak se Komisioni i Pavarur i Kualifikimit arriti në përfundimin se pasuria e tij prej qindramijëra euroshe nuk mund të justifikohej me burime të ligjshme. Ai u shkarkua nga detyra më 23 mars të vitit 2018.
Lulo, 57 vjeç, pati një karrierë të gjatë si jurist, avokat dhe gjyqtar. Ai rezultoi se kishte krijuar një pasuri me vlerë prej 92 milionë lekësh, nga të cilat 75 milionë pretendoi se i kishte krijuar përpara fillimit të detyrës si gjyqtar.
