Deputeti i qarkut të Vlorës, Fation Veizaj njoftoi të hënën se do të dorëzonte mandatin e deputetit të Kuvendit të Shqipërisë. Ai e argumentoi vendimin me përçarjen politike brenda grupit parlamentar të Partisë Demokratike, ku ai bënte pjesë.
“Duke refuzuar kategorikisht përjashtimet nga njëra anë, por dhe mënyrën e përdorur nga individë të caktuar në kërkim pushteti personal, pa respektuar dinjitetin e deputetëve të zgjedhur dhe me pasojë thellimin e përçarjes nga ana tjetër, kam vendosur të heq dorë nga mandati i deputetit,” shkroi Veizaj përmes një statusi në Facebook.
Veizaj e lidh aktin e tij politik me vendimin e kreut të grupit parlamentar Enkelejd Alibeaj për të përjashtuar 4 deputetë nga grupi, duke e cilësuar këtë veprim të “tepërt” dhe një rrugë drejt ndarjes së pakthyeshme të partisë.
Veizaj u zgjodh për herë të parë si deputet në zgjedhjet parlamentare të prillit 2021. Ne jetëshkrimin e tij zyrtar mësohet se ka pasur pozicione drejtuese në kompanitë e naftës “ARMO” dhe “Taçi Oil” e më pas është futur në fushën e biznesit të naftës me kompaninë e tij “RDA Petrol”.
Veizaj është deputeti i katërt demokrat që jep dorëheqjen nga mandati. Pedagogu Mark Marku, kryetari i grupit parlamentar, Alfred Rushaj dhe e fundit Grida Duma kanë lënë mandatet më herët.
Pas humbjes së zgjedhjeve, edhe vendimi i ish-kryetarit të partisë, Lulzim Basha për të përjashtuar nga grupi paraardhësin e tij Sali Berisha e futi këtë parti në një luftë të brendshme. Grupi parlamentar aktualisht është i ndarë në dy grupime që kërkojnë të kenë në dorë drejtimin e tij. Para nisjes së sesionit parlamentar, kryetari i grupit, Enkelejd Alibeaj, njoftoi Kuvendin për përjashtimin e 4 deputetëve kundërshtarë nga grupi parlamentar demokrat.
