Prokuroria e Posaçme kundër Korrupsionit dhe Krimit të Organizuar, njoftoi të enjten se kishte përfunduar hetimet me akuzat e “Korrupsionit aktiv të gjyqtarit” dhe “Korrupsioni pasiv të gjyqtarëve”, ndaj gjyqtares së Gjykatë së Elbasanit Zamira Vyshka, një avokati dhe tre personave të tjerë të marrë nën hetim që prej vitit 2021 dhe të arrestuar me këto akuza në korrik 2022.
“Fakti penal i hetuar, lidhet me një rast të korrupsionit aktiv/pasiv në sistemin e drejtësisë (në qytetin e Elbasanit), ku persona të interesuar/familjarë të një shtetasi të arrestuar në bashkëpunim me avokatin mbrojtës, i kanë ofruar gjyqtarit të çështjes një shumë monetare me qëllim favorizimin në caktimin e masës së dënimit”, thuhet në njoftimin e SPAK.
Prokuroria e Posaçme thotë se provat e grumbulluara për këtë çështje ishin të mjaftueshme për të filluar gjykimin e të akuzuarve dhe se i është drejtuar Gjykatës së Posaçme të Shkallës së Parë për Korrupsionin dhe Krimin e Organizuar me kërkesë për dërgimin e çështjes për gjykim.
Gjyqtarja Zamira Vyshka, akuzohet për kryerjen e veprës penale të “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, ndërsa avokati Ilir Pashaj dhe dy personat e tjerë Taulant Ramollari dhe Xhulio Musaj akuzohen për “Korrupsioni aktiv të gjyqtarit, prokurorit dhe i funksionarëve të tjerë të drejtësisë”, kryer në bashkëpunim.
Ndërkohë në këtë çështje është ngritur akuzë edhe ndaj Andrea Tirana i akuzuar për kryerjen e veprës penale të “Moskallëzimit të krimit”.
