Gazetarë të emisionit “Fiks Fare” në televizionin Top-Channel u sulmuan të mërkurën ndërsa filmonin gërryerjen me makineri në shtratin e Lumit Zezë, në Fushë-Krujë. Vetë “Fiks Fare” transmetoi pamjet e kanosjes së ekipit të xhirimit dhe gazetares Antela Lika, ku shfaqen tre persona të armatosur me armë gjuetie dhe dëgjohen të shtëna.
“Fiks Fare” tha se personat e armatosur qëlluan ndaj dronit që po filmonte mbi lumë. Gazetarja Antela Lika dhe grupi i xhirimit u ndaluan më pas nga një person që i kanosi, duke i kërkuar të mos filmonin. Pasi kishin njoftuar drejtuesin e Komisariatit të Policisë Krujë dhe po prisnin forcat e rendit, një person i dytë i maskuar i ndaloi dhe sipas ekipit të xhirimit u theu kamerën, i ofendoi dhe dhunoi.
“Unë kam qenë duke kryer detyrën time, ata njerëz personalisht nuk i njoh dhe as nuk dua t’i njoh. Si në çdo mision timin gazetaresk, nuk kam asgjë personale me askënd”, komentoi për BIRN, gazetarja Antela Lika. “Pavarësisht nëse institucionet shtetërore e bëjnë detyrën apo jo, unë jam e vendosur në misionin tim”, shtoi Lika.
Ata po dokumentonin gërryerjen e Lumit Zezë në zonën e Fshatit Verjon, në Fushë-Krujë, ku eskavatorë dhe kamionë nxirrnin inerte në mënyrë të paligjshme.
Vetëm një ditë pas ngjarjes Drejtoria Vendore e Policisë Durrës njoftoi se kishte identifikuar 3 agresorët qe kishin qëlluar me armë, por pa specifikuar se për çfarë veprash penale dyshoheshin.
“E. K. (drejtuesi i ekskavatorit), G. K., 30 vjeç dhe H. V., 30 vjeç, pasi këta shtetas, në bashkëpunim me njëri-tjetrin, kanë kërcënuar grupin e xhirimit, duke qëlluar me armë gjahu, në basenin e Lumit Zezë”, njoftoi policia për media.
Ajo shtoi se ishin identifikuar dy drejtuesit e kamionëve që u shfaqën ne video, me iniciale A. L. dhe E. Gj., të cilët dyshohen për veprat penale “Shpërdorimi i tokës” dhe “Kanosja për shkak të detyrës”, duke i sekuestruar edhe kamionët.
Dy punonjësit me iniciale E. B. dhe F. Sh., të Inspektoratit Kombëtar të Mbrojtjes së Territorit në Drejtorinë Rajonale Durrës sipas policisë u referuan në prokurori sepse ishin përgjegjës për monitorimin e kësaj zone. Ata dyshohen për veprën penale “Shpërdorimi i Detyrës”.
Për gazetaren Antela Lika ky është rasti i dytë i sulmit në detyrë brenda 1 viti. Më 22 mars të 2022-ës ajo dhe ekipi i xhirimit u ndalua të filmonin në një tokë ku dyshohej se një pulari kishte groposur pa autorizim karkasat e pulave të ngordhura nga epidemia e shpendëve. Por policia nuk e ndoqi penalisht të denoncuarin, duke kërkuar kallëzim me shkrim nga gazetarët.
Lika i tha BIRN se sipas saj nëse do të ishin marrë masa në rastin e parë, mund të kontribuonte në përmirësimin e kilmës së sigurisë ndaj gazetarëve dhe në parandalimin e këtij fenomeni.
Ngjarja e Fushë-Krujës u dënua nga presidenti Bajram Begaj dhe Autoriteti i Mediave Audiovizive, duke apeluar që të identifikohen përgjegjësit dhe të dërgohen para drejtësisë. Unioni i Gazetarëve Shqiptarë po ashtu e denoncoi sulmin duke e cilësuar kërcënim serioz dhe një ngjarje të rëndë dhe tronditëse.
“Imazhet e publikuara prej emisionit, në të cilat persona të armatosur, agresivë dhe brutalë në komunikimin me reporteren dhe operatorin, me armë në duar të cilat i përdorin ndaj dronit të medias, janë një dëshmi autentike se sa i kërcënuar është gazetari në terren, se sa i pasigurt”, thuhet në reagimin e Unionit.
Një muaj më parë edhe gazetari i Report Tv në Lezhë, Elvis Hila, u dhunua nga 2 persona pas raportimit për një vendim gjyqësor. Pre e sulmit ra edhe bashkëshortja e tij, e cila gjendej me të. Policia njoftoi se shpalli në kërkim dy autorët e dyshuar të rastit.
Episodet e dhunës dhe kanosjes ndaj gazetarëve duket se po përkeqësojnë lirinë e medias në vend gjatë viteve të fundit.
