Mbledhja e Gjyqtarëve të Gjykatës Kushtetuese zgjodhi të hënën më 20 shkurt 2023 si kryetaren e kësaj gjykate, gjyqtaren Holta Zaçaj. Procesi për përzgjedhjen e kryetares së Gjykatës Kushtetuese filloi më 2 shkurt, kur në përmbyllje të afatit të aplikimeve shprehën interesin për këtë funkson gjyqtaret Fiona Papajorgji, Marjana Semini dhe Holta Zaçaj.
Dy mbledhjet e mëparshme të zhvilluara në datat 15 dhe 17 shkurt dështuan të përzgjidhnin kryetaren, pasi asnjë nga kandidatet nuk mori shumicën ligjore prej të paktën 5 votash, që përbënë shumicën e votave të 9 anëtarëve që ka në përbërje Gjykata Kushtetuese. Ndërsa në raundin e tretë më 20 shkurt, gjyqtarja Holta Zaçaj ka arritur të sigurojë votat e mjaftueshme për tu zgjedhur si kryetare.
Mbledhja e Përgjithshme e Gjykatës së Lartë zgjodhi më 16 janar 2023 avokaten Holta Zaçaj si anëtare të Gjykatës Kushtetuese, duke përmbyllur sagën e plotësimit të kësaj gjykate që prej fillimit të reformës në drejtësi.
Zaçaj zëvendësoi gjyqtaren Vitore Tusha, së cilës i kishte përfunduar mandati që në vitin 2017.
Më pare, Zaçaj ka qenë “avokate e specializuar në të drejtën familjare, mbrojtjen e fëmijëve dhe transaksioneve me pasuri të patundshme”. Po ashtu ajo ka qenë anëtare e Komitetit për Shërbimet e Mbrojtësit Publik-Divizioni për fëmijët dhe familjen, në shtetin e Massachusetss në Shtetet e Bashkuara të Amerikës.