12 ditë pasi bllokoi në detë një anije nga Liberia me 22.500 ton naftë të dyshuar kontrabandë, policia e Durrësit njoftoi enjten se ishte kryer arrestimi i kapitenit të anijes dhe po ashtu sekuestrimi i mjetit dhe i sasisë së naftës në të.
47 vjeçari Alexey Smaznov nga Rusia akuzohet për veprat penale “Kontrabanda me mallrat për të cilat paguhet akcizë” dhe “Tregtimi dhe transportimi i mallrave që janë kontrabandë”.
Anija u ndalua në radën e Durrësit më 19 shkurt, në kuadër të operacionit policor të koduar “Embargo” dhe dyshohet se kishte dokumentacion të falsifikuar dhe se nafta e kishte origjinën nga vendet me embargo.
Në vendimin e prokurorisë për sekuestrimin e provave materiale, të cilin BIRN e lexoi, dhe që mban datën 24 shkurt, shkruhet se, “…ka rezultuar se nuk dihet origjina e kësaj nafte dhe dyshohet se është naftë me prejardhje ruse”.
Në vendim e prokurorit Drini Pali thuhet se bazuar në këto dyshime dhe bazuar në vendimin e qeverisë për të vendosur embargo ndaj mallrave nga Rusia, anija dhe nafta janë sekuestruar.
Anija “Grace Felix” me flamur liberian gjendet në radën e Porto-Romanos në Durrës dhe në momentin e ndalimit kishte një ekuipazh prej 22 personash. Nafta që ajo solli në Durrës dhe që dyshohet se do të kontrabandohej në tregun vendas kishte vlerë 46.4 milionë euro.
Ndërkohë deri më tani rastet e kapjes së naftës kontrabandë dhe nga vendet me embargo kanë mbetur vetëm në arrestimin e anëtarëve të ekuipazhit, pa identifikuar plotësisht dërguesit, blerësit dhe përgjegjësinë e tyre për naftën. As në rastin e fundit hetimet e deri tanishme nuk kanë treguar se kush në Shqipëri po e blinte naftën apo e kishte porositur atë.
BIRN përllogariti se në katër operacione policore të mëparshme dhe të sotmin, janë sekuestruar rreth 24 mijë e 800 tonë naftë që dyshohet kontrabandë, me origjinë nga Libia dhe Rusia, për të cilat janë arrestuar vetëm anëtarët e ekuipazhit.
