Aktivistët dhe një grup studentesh të ardhura nga disa shtete zhvilluan të mërkurën në Durrës një marshim-protestë në Ditën Ndërkombëtare të Gruas, për të sjellë në vëmendje rastet e dhunës dhe të krimeve kundër grave.
“Mesazhi im për gratë dhe vajzat shqiptare është që nëse ju keni përjetuar ndonjë lloj dhune, duhet të ndiheni mjaft të abuzuara, duhet të dilni në protestë për të treguar pozicionin tuaj sepse nuk është çështje private”, tregoi për BIRN, Oleksandra Shevchenko.
25 vjeçarja nga Ukraina studion në Francë dhe së bashku me 4 studente të tjera nga Senegali, Madagaskari, Maroku dhe Shqipëria u bashkuan në Durrës për të kontribuar në sjelljen e një mesazhi ndryshe për 8 mars, në kushtet kur agresoni rus ndaj Ukrainës e ka rritur pasigurinë e grave.
“Unë jam ukrainase dhe në Ditën Ndërkombëtare të Gruas, rusët vijojnë të bëjnë shumë krime kundër grave dhe të gjithë ukrainasit janë prekur nga këto krime”, shtoi Shevchenko.
Qytetarët e Durrësit lexuan me kërshëri pankartat dhe një pjesë e tyre ju bashkuan aktivistëve, ndërsa të tjerë duartrokitën aktivistet që përshkuan Shëtitoren Taulantia në pikun e parapërgatitjes së restoranteve përbri detit, që kanë marrë rezervime për të festuar 8 marsin.
Marshimi-protestë i organizuar nga Shoqata Gender Paqe dhe Siguri, në bashkëpunim me Rrjetin e Fuqizimit të Gruas në Shqipëri, ishte në vijim të disa aktiviteteve që synojnë të rrisin ndërgjegjësimin e qytetarëve për të kërkuar të drejtat e vajzave dhe grave.
Muajt e fundit krimet ndaj grave dhe vajzave kanë qenë të shpeshta edhe në qarkun e Durrësit, që evidentohet nga aktivistët si më problematiku sa i përket rasteve të raportuara të dhunës ndaj grave.
“Qarku i Durrësit sipas të dhënave të INSTAT vazhdon të mbajë vendin e parë në Shqipëri në lidhje me raportimin e dhunës në familje”, komentoi për BIRN Erisilda Shpata, avokate pranë Shoqatës Gender Paqe dhe Siguri.
Sipas aktivistes gjatë vitit të shkuar janë raportuar 882 vepra të dhunës në familje pranë Komisaritatit të Policisë Durrës, ndërkohë që vetëm në 2 muajt e parë të 2023-it janë raportuar rreth 125 vepra të dhunës në familje.
“Ajo që vihet re është që një pjesë e urdhrave të menjëhershëm të mbrojtjes shoqërohen edhe me kallëzime penale në prokurori”, shpjegoi Shpata.
Sipas saj nuk kemi vetëm dhunë në kontekstin e fyerjeve apo të dhunës verbale, por kemi edhe dhunë fizike që sjell apo rrezikon jetën e grave dhe të vajzave.
8 marsi, Dita Ndërkombëtare e Gruas, e ndan shoqërinë shqiptare në dy pjesë, ata që e konsiderojnë si festë dhe të tjerët që e vlerësojnë si një ditë për të protestuar për më shumë të drejta për vajzat dhe gratë.
