Për shtetasit afganë që mbërritën në Shqipëri në gusht të vitit 2021 pasi forcat talebane morën nën kontroll qeverinë e Kabulit, afati i mbrojtjes do të shtyhet deri më 24 gusht të këtij viti. Ndërsa për shtetasit ukrainas që u larguan për shkak të agresionit rus në Ukranë, afati i mbrojtjes do të shtyhet deri në shtator 2023.
Në të dyja rastet, VKM-të parashikojnë “dhënie të mbrojtjes së përkohshme” dhe vijimin e punës së Task-forcës së krijuar për menaxhimin e fluksit të kërkuesve të mbrojtjes ndërkombëtare.
Në verën e vitit 2021, Shqipëria hapi dyert për mijëra qytetarë afganë që largoheshin nga Afganistani pasi vendi ra nën kontrollin e talebanëve. Ata do të qëndronin në vend deri në përfundim të dokumentacionit për t’u strehuar në SHBA, sipas një marrëveshje mes Shqipërisë dhe SHBA-së.
Shumica dërrmuese e refugjatëve që mbërritën në Shqipëri ishin gazetarë, ish-zyrtarë të qeverisë afgane dhe aktivistë e punonjës të organizatave jo qeveritare apo bashkëpunëtorë të NATO-s. Një pjesë e tyre u akomoduan fillimisht në qytetin “Studenti” në Tiranë dhe më pas u strehuan në qytetet bregdetare të Durrësit e Shëngjinit.
Një vit më vonë, në verën e 2022, qindra gra dhe fëmijë refugjatë që kërkonin t’i shpëtonin luftës në Ukrainë u strehuan në plazhin e Durrësit.