Përfaqësuesit e Dhomave të huaja të Tregtisë në Shqipëri i bënë thirrje qeverisë përmes një deklarate të përbashkët të martën që të përmirësojë klimën e biznesit si dhe të ndërmarrë reforma të qënësishme për nxitjen e investimeve të huaja.
Deklarata është nënshkruar nga Dhoma Amerikane e Tregtisë, Dhoma Gjermane e Tregtisë, ajo Italiane, Confindustria Albania si dhe Dhoma Franceze e Tregtisë.
“Ne pranojmë potencialin e vendit për biznes dhe investime të huaja për shkak të vendndodhjes strategjike, burimeve natyrore dhe forcës së talentuar të punës. Megjithatë, anëtarët tanë vazhdimisht e vlerësojnë mjedisin e biznesit si një prej tre sfidave kryesore të të bërit biznes në Shqipëri, dhe ne besojmë se mjedisi aktual është jo efektiv dhe kërkon përmirësim të dukshëm,” thuhet në deklaratë.
Duke e konsideruar Shqipërinë si një vend aspirant për Bashkimin Europian, ata i bënë thirrje qeverisë shqiptare, parlamentit dhe agjencive shtetërore të tjera përgjegjëse për t'u angazhuar ndaj reformave ekonomike dhe të investimit në fusha të tilla si implementimi i një pakete anti-korruptive, krijimi i një procesi efektiv të konsultimit publik, modernizimi i sistemit të taksave, adoptimi i një strategjie investimi si edhe krijimi i një Këshilli Kombëtar Ekonomik të ri.
Gjithashtu, përfaqësuesit e biznesit të huaj kërkojnë adoptimin e një strategjie investimi që përfshin edhe reduktimin e pengesave burokratike si dhe rritjen e efikasitetit dhe besueshmërisë së sistemit të Prokurimit Publik në vend.
Mes kërkesave është edhe “zbatimi i një pakete me qëllim luftën kundër korrupsionit që forcon masat kundër rryshfetit me standardet e OECD-së dhe që siguron transparencë në veprimtaritë e agjencive publike”.
Sipas deklaratës, kjo do të rriste ndjeshëm besimin e komunitetit të biznesit në përgjithësi dhe veçanërisht të kompanive të huaja që investojnë në Shqipëri.
Së fundmi, dhomat e huaja të tregtisë inkurajojnë krijimin e një Këshilli të ri Kombëtar Ekonomik me fokus të veçantë te investimet e huaja të drejtpërdrejta. “KEK-u mund të shërbejë si platformw për dialog dhe bashkëpunim midis sektorëve publikë dhe privatë për nxitjen e zhvillimit ekonomik dhe krijimin e një klime më të favorshme investimesh,” përfundon deklarata.