Dy sera me kanabis u zbuluan në fshatin Shkozë e Bardhë në Krujë, ndërsa policia shpalli në kërkim autorët e dyshuar, at e bir dhe nisi një procedim penal ndaj kryeplakut të fshatit.
Shërbimet e Komisariatit të Policisë Krujë njoftuan se gjatë kontrolleve në territorin e fshatit Shkozë e Bardhë në Thumanë në Krujë u gjet sera me bimë narkotike.
Në një njoftim të shpërndarë për mediat policia bën me dije se gjatë operacionit policor në afërsi të banesës së shtetasve E. R. dhe D. R. (babë e bir), u zbuluan “2 sera në të cilat u gjetën të kultivuar në kubikë 610 fidanë të dyshuar narkotikë cannabis sativa”.
Por të dyshuarit si kultivues nuk u gjetën në shtëpi dhe u shpallën në kërkim. Ndërkohë policia nisi një procedim për kryeplakun e fshatit.
Kjo është sera e tretë me kanabis e zbuluar në krujë që prej fillimit të kontrolleve kundër kultivimit. Në 17 mars policia zbuloi një tunel në të cilin ishte kultivuar droga. Më pas në një rast të dytë u gjet një serë e kultivuar nga dy vëllezër.
Serat në mjedise të mbyllura duket se kanë zëvendësuar kultivimin në fushë të kanabisit. Sasia më e madhe e drogës u zbulua në Koplik më 29 mars, kur policia shkatërroi mbi 8 mijë fidanë në 27 sera të ndërtuara brenda një krateri inertesh.
