Gjykata e Posaçme e Shkallës së Parë për Korrupsionin dhe Krimin e Organizuar dënoi të martën më 25 prill dy të besuarit e biznesmenit kontrovers të naftës, Rezart Taçi, që së bashku me disa shtetas italianë të dyshuar për lidhje me mafien, u akuzuan në nëntor të vitit 2021 se u përfshinë në një operacion financiar ndërkombëtar për fshehjen e më shumë se 18 milionë eurove nga konfiskimi në Itali, si dhe për tentativë të pastrimit të tyre.
I pandehuri Artur Balla u deklarua fajtor nga gjykata për veprat penale “Pastrimi i produkteve të veprës penale ose veprimtarisë kriminale” dhe “Grupi i strukturuar kriminal”, duke u dënuar në përfundim me 11 vjet burgim, që në aplikim të gjykimit të gjykimit të shkurtuar u reduktua 7 vjet e 4 muaj burgim. Për të njëjtat akuza u deklarua fajtor edhe i pandehuri Bledar Lilo, ndaj të cilit u caktua dënimi përfundimtar me 6 vjet e 8 muaj heqje lirie.
Gjykata disponoi të martën edhe lidhur me provat materiale të sekuestruara në kuadër të këtij procedimi, duke vendosur konfiksimin e vlerës prej 18 milionë e 399 mijë euro të ndodhur në një llogari në emër të shtetasit Francesco Zummo, shumë që do të kalojë në favor të shtetit.
Ndërkohë, sendet e tjera të sekuestruara, një aparat telefoni që iu sekuestrua të pandehurit Artur Balla dhe dy celularë të tjerë të Bledar Lilos u vendos që të qëndrojnë në fashikull për shkak të procedimit të ndarë për Rezart Taçin.
Më 28 tetor 2022, SPAK njoftoi përfundimin e hetimeve dhe dërgimin për gjykim të dosjes ndaj Rezart Taçit, Artur Ballës dhe Bledar Lilos, që akuzohen se në bashkëpunim me shtetasit italianë Francesco Zummo, Fabio Petruzzella, Daniele Cestagalli, si dhe disa persona të tjerë, krijuan një skemë ndërkombëtare pastrimi parash. Ata u akuzuan për veprat penale “Pastrimi i produkteve të veprës penale ose veprimtarisë kriminale”, “Grupi i strukturuar kriminal”, “Kryerja e veprave nga grupi i strukturuar kriminal””.
Taçi u shpall në kërkim për këto akuza në nëntor 2021, ndërsa dy të akuzuarit si bashkëpunëtorë të tij, Artur Balla dhe Bledar Lilo, u arrestuan në Tiranë. Mes të ndaluarve në Itali si pjesë e këtij grupi ishte dhe 91 vjeçari Francesco Zummo, i hetuar më parë nga magjistrati Giovanni Falcone si i dyshuar për favorizimin e organizatës mafioze “Cosa Nostra”, i cili u la me masë sigurimi arresti në shtëpi.
Sipas SPAK, skema financiare është drejtuar nga Zummo dhe Petruzella, në bashkëpunim me një shtetas zviceran me origjinë italiane dhe ish-bosin shqiptar të naftës, Rezart Taçi.
Çështja penale në ngarkim të të pandehurit Rezart Taçi është ndarë gjatë fazës së seancës paraprake dhe do të gjykohet si çështje penale më vete, për shkak se është në mungesë. Sipas SPAK, për Taçin duhet të kryhen proçedurat e nevojshme për të pandehurit që gjykohen në mungesë.
