Bashkia e Klosit në zonën e Matit ka votuar opozitën e djathtë me rezultat të konsiderueshëm prej kohësh. Ajo ishte nga të paktat bashki që mbeti në duart e demokratëve në vitin 2015, kur koalicioni PS+LSI, zyrtarisht i njohur si Aleanca për Shqipërinë Europiane, fitoi shumicën dërrmuese të votave dhe bashkive në ato zgjedhje. Kandidatja e këtij koalicioni, Valbona Kola, një mjeke, humbi përballë kandidatit të PD-së, Basir Çupa me rezultatin 55% me 44%.
Socialistët kanë vendosur të garojnë sërish Valbona Kolën në zgjedhjet e 14 majit 2023, kësaj here përballë ish-deputetit dhe ish-kandidatit për kryetar, Bedri Hoxha. Hoxha garoi në zgjedhjet e vitit 2019 si kandidat i pavarur dhe humbi, duke marrë 32% të votave përballë kandidatit të PS-së, Ilmi Hoxha.
Pasja nën kontroll të bashkisë, e cila, më vete numëron një administratë prej 230 vetësh, nuk e ndihmoi dot PS-në as në zgjedhjet parlamentare të vitit 2021. Ata humbën me 176 vota diferencë përballë koalicionit aktual opozitar, të përfaqësuar nën siglën Bashkë Fitojmë.
Siç shihet, e djathta vijon të ketë avantazh në këtë bashki, por largimi i popullsisë dhe rënia e pjesëmarrjes në zgjedhje e ka gërryer avantazhin e saj. Kandidatët socialistë për kryebashkiak e kryekomunarë patën marrë sëbashku 3700 vota në zgjedhjet e vitit 2011. Socialistët morën vetëm 8 vota më pak në zgjedhjet parlamentare të vitit 2021. Demokratët dhe LSI morën 3900 vota në zgjedhjet parlamentare të 2021 ndërsa patën marrë më 2011 4700 vota. (Demokratët dhe LSI garuan në koalicion të përbashkët në zgjedhjet e vitit 2011 pasi ishin në koalicion të përbashkët në qeverinë qendrore). Pjesëmarrja në votime mes dy zgjedhjeve, pra mes vitit 2011 dhe 2021, ka rënë në territorin e kësaj bashkie me gati 1200 vota, por këto votat e të larguarve duket se kanë tendencën të kenë qenë mbështetës së opozitës dhe jo të maxhorancës.
Bashkia Klos përbëhet nga 4 njësi administrative, të cilat janë: qyteti i Klosit dhe ish-komunat: Xibër, Suç dhe Gurrë. Bashkia shtrihet përgjatë lumit Mat në një territor kodrinor dhe malor. Ajo ka një sipërfaqe prej 357 kilometrash katrore. Bashkia është lidhur së fundmi me Tiranën me një rrugë të shkurtër, e cila kalon përmes Qafës së Murrizit.
Klosi është një qytezë e ndërtuar si pjesë e industrisë së kromit dhe të bakrit në kohën e Komunizmit.
