Votuesit e bashkisë së Kurbinit në Shqipërinë qendrore pritet të zgjedhin më 14 maj mes kryebashkiakes aktuale, Majlinda Cara, një mësuese dhe Behar Haxhiut, kandidatit të koalicionit Bashkë Fitojmë. Bashkia e Kurbinit është qeverisur nga socialistët që nga viti 2015, kur kandidati i opozitës, Altin Biba u tërhoq nga gara përballë kandidatit socialist Artur Bardhi. Socialistët nuk e rikandiduan Bardhin më 2019 dhe e zëvendësuan me Carën, e cila fitoi pa garë. Forca e opozitës aktuale në bashki u vu re në zgjedhjet e vitit 2021, kur PD dhe LSI të marra sëbashku mobilizuan 61% të votave, ndërsa socialistët shënuan rezultatin më të keq në një dekadë me 29% të votave.
Bashkia e Kurbinit shtrihet në një zonë kodrinore dhe fushore deri në bregun e Adriatikut dhe ka karakter të përzierë industrial dhe bujqësor. Bashkia përbëhet nga katër njësi administrative: Laçi, Mamurrasi, Miloti dhe Fushë-Kuqja. Në këtë bashki ka tre qytete, Laçi, Miloti dhe Mamurrasi dhe 27 fshatra.
Qyteti i Laçit u ndërtua në kohën e komunizmit si qendër industriale në funksion të fabrikës së Superfosfatit dhe të Bakrit blistër. Qyteti aktualisht ka një fabrikë fason si dhe shërbime të ndryshme ndërsa industria e dikurshme falimentoi shumë dekada më parë, duke lënë pas vetëm rrënojat.
Laçi ka një vijë bregdetare të pazhvilluar në zonën e Fushëkuqes, e cila përfshin një segment veçanërisht të ndotur në grykëderdhjen e lumit Ishëm dhe lagunën e Patokut.
Popullsia votuese në Kurbin është rritur nga 51 mijë në gati 59 mijë vetë mes viteve 2011 dhe 2021. Pjesëmarrja në votime ka rënë nga 51 në 43%.