Banorët e bashkisë së Korçës pritet të zgjedhin në 14 maj mes kryebashkiakut aktual, Sotiraq Filo, i cili mban postin që nga viti 2013 dhe që garon për Partinë Socialiste dhe pedagoges së ekonomisë, Ledina Alolli, e cila garon si përfaqësuese e koalicionit opozitar Bashkë Fitojmë. Bashkia e madhe e Korçës ka pasur një kryebashkiak socialist që kur koalicioni PS+LSI fitoi me lehtësi në zgjedhjet e vitit 2015, ndërsa qyteti i Korçës, ku jetojnë gati 70% e votuesve të bashkisë së madhe, kanë votuar një kandidat socialist që nga viti 2007, kur Niko Pelesh mposhti me rezultat të thellë kandidatin demokrat, Gjergji Papa.
Korça është një nga bashkitë ku numri i votuesve dhe pjesëmarrja në përqindje ka rënë gjatë dekadës së fundit. Dy grupet e mëdha kanë humbur vota, ndërsa grupi “Të tjerë” ku përfshihen partitë e vogla dhe qytetarët që kanë djegur votat si të pavlefshme, ka njohur rritje.
Në zgjedhjet parlamentare të vitit 2021, socialistët dhe aleati i tyre aktual, Partia Socialdemokrate, fituan sëbashku 21 mijë vota, vetëm 600 vota më shumë se sa dy partitë opozitare, Partia Demokratike dhe Lëvizja Socialiste për Integrim. Tetë përqind e votave u kaluan partive të vogla ose ishin vota të pavlefshme, gjë që sugjeron se gara për 14 majin, së paku në teori, mbetet e hapur.
Numri i votuesve në Korçë është 109 mijë ndërsa pjesëmarrja në zgjedhjet e fundit ka qenë 42%.
Këshilli i Bashkisë Korçë ka 41 anëtarë. Në garë për këshilltarë janë 15 parti, të cilat kanë në listat e tyre 591 kandidatë. Për këshilltar garon edhe Lazjon Pjetri si i pavarur.
Korça është një bashki që shtrihet në rrafshnaltën me të njëjtin emër në Shqipërinë juglindore, një zonë malore. Vetë fusha e Korçës gjendet në lartësinë 850 metra mbi nivelin e detit. Kjo bashki përbëhet nga 8 njësi administrative, të cilat janë: Korçë, Qendër Bulgarec, Voskop, Voskopojë, Lekas, Vithkuq, Mollaj dhe Drenovë. Të gjitha njësitë administrative janë aktualisht pjesë e rrethit të Korçës dhe qarkut Korçë. Bashkia e re ka nën administrimin e saj një qytet dhe 62 fshatra. Për të parë listën e plotë të qyteteve dhe fshatrave të kësaj bashkie, klikoni këtu.
Një qendër e rëndësishme kulturore dhe historike, zona e Korçës ka pësuar rënie popullsie dhe vështirësi ekonomike gjatë tre dekadave të fundit, pasi industria e kohës së Komunizmit është mbyllur duke e lënë qytetin me një bazë modeste ekonomike. Zonat bujqësore përreth Korçës konsiderohen gjerësisht toka pjellore ndërsa zonat malore të Drenovës, Vithkuqit e Voskopojës janë të njohura si destinacione turistike. Bashkia e re numëron 5700 kompani të regjistruara, përfshirë biznesin e vogël për vetëpunësim.
Vetë Korça ka zhvilluar turizmin duke shfrytëzuar trashëgiminë e pasur arkitekturore të qytetit.