Dogana e Kapshticës duket se luan një rol vendimtar në jetën ekonomike të bashkisë së vogël të Devollit në Shqipërinë juglindore, si dhe në politikën e saj. Ish-kryebashkiaku Bledion Nallbati, i cili fitoi bashkinë me rezultat të ngushtë për demokratët në vitin 2015, ishte ish-punonjës i doganës. Kryebashkiaku aktual Eduart Duro i Partisë Socialiste, i cili garon për një mandat të dytë më 14 maj, ka punuar si tatimor dhe agjent doganor. Duro sfidohet nga Elvis Hajdërlli, kandidat i koalicionit Bashkë Fitojmë.
Bashkia e Devollit ka mbështetur Partinë Demokratike në opozitë në vijimësi. Me përjashtim të vitit 2019, kur socialistët fituan pa garë, PD i ka fituar të gjitha zgjedhjet e tjera. Në vitin 2011, qyteza e Bilishtit dhe të gjitha komunat përbërëse të bashkisë Devoll votuan kandidatë demokratë ndërsa në zgjedhjet e vitit 2007, socialistët fituan vetëm një nga katër komunat përbërëse.
Bashkia e Devollit numëron 34 mijë votues, nga të cilët, 25% banojnë në qytezën e Bilishtit ndërsa pjesa tjetër, në katër komunat përbërëse të bashkisë së re, Qendër Bilisht, Hoçisht, Progër dhe Miras. Të gjitha njësitë administrative janë aktualisht pjesë e rrethit të Devollit dhe qarkut të Korçës. Bashkia e re ka nën administrimin e saj një qytet dhe 44 fshatra. Për të parë listën e plotë të qyteteve dhe fshatrave të kësaj bashkie, klikoni këtu.
Numri i qytetarëve me të drejtë vote ka njohur një rritje të lehtë përgjatë dekadës së fundit nga 32 në 33500 mes viteve 2011 dhe 2021. Numri i votuesve ka rënë nga 19 mijë në 17 mijë. Partitë e opozitës kanë humbur më shumë vota se sa manxhoranca, e megjithatë mbeten në avantazh.