Andis Salla, 35 vjeç, jurist me eksperiencë si drejtor burgu, kërkon mandatin e tij të dytë nga votuesit e Cërrikut në 14 maj, pasi mori mandatin e parë në vitin 2019 në zgjedhje pa garë. Ai sfidohet nga Servet Duzha, i cili ka qenë më herët kryebashkiak.
Bashkia e Cërrikut përbëhet nga qyteti i Cërrikut, një ish qendër industriale dhe komunat Gostimë, Mollas, Shalës dhe Klos. Bashkia ka gati 38 mijë qytetarë me të drejtë vote, ndërsa pjesëmarrja në zgjedhjet e fundit ka qenë 40%. Rezultati zgjedhor është përmbysur nga në favor të së djathtës, në favor të së majtës. Në zgjedhjet e vitit 2007 dhe 2011, kandidatët e Partisë Demokratike për qytetin e Cërrikut dhe ish-komunat kishin një avantazh të dukshëm përballë kandidatëve socialistë. Në vitin 2015, bashkia e re u fitua nga Altin Toska, i cili përfaqësonte koalicionin Aleanca për Shqipërinë Europiane, ku bënin pjesë Partia Socialiste dhe partia Lëvizja Socialiste për Integrim. Toska ishte i kandiduar nga LSI. Kalimi i LSI-së në opozitë në vitin 2017 nuk e ndyshoi realitetin në këtë bashki. Në zgjedhjet e vitit 2021, Partia Socialiste fitoi 56% të votave në nivel bashkie ndërsa kundërshtarët e saj aktualë, Partia Demokratike dhe Lëvizja Socialiste për Integrim, morën sëbashku vetëm 36% të votave.
Numri i votuesve me të drejtë vote në bashkinë Cërrik është rritur me 5 mijë vetë mes viteve 2011 dhe 2023. Numri i pjesëmarrësve në zgjedhje ka rënë me 1 mijë vetë nga viti 2011 në vitin 2021. Rrjedhimisht, pjesëmarrja në zgjedhje ka rënë nga 49 në 40%. Dy partitë kryesore të opozitës, PD dhe LSI, kanë humbur rreth 3 mijë vota mes viteve 2011 dhe 2021 ndërsa PS ka arritur të fitojë mbi 2,200 vota.
Bashkia e Cërrikut shtrihet në një zonë kodrash të buta mes Lumit Shkumbin dhe Lumit Devoll në Shqipërinë qendrore. Qyteti i Cërrikut u shpall me statusin qytet në vitin 1952 pasi pranë tij u ndërtua një rafineri nafte, e cila kishte për funksion përpunimin e naftës së zonës së Kuçovës. Një aeroport ushtarak aty pranë dhe një termocentral në funksion të rafinerisë përbënin burimin kryesor të punësimit për banorët e qytezës. Rafineria filloi të mbyllej që nga vitet 1980 kur prodhimi në fushën naftëmbajtëse të Kuçovës filloi të pakësohej. Qyteti tashmë është braktisur nga një pjesë e konsiderueshme e popullsisë dhe kjo vihet re nga fakti që pjesëmarrja në qendrat e votimit të qytetit Cërrik ishte vetëm 37% në vitin 2021, nga 40% në nivel bashkie dhe 43% në nivel vendi.
Njëmbëdhjetë parti me 243 kandidatë garojnë për 21 vendet e këshillit bashkiak të Cërrikut.