Gjyqtari Petraq Çurri i Gjykatës së Durrësit do të përballet të mërkurën më 10 maj me Komisionin e Pavarur të Kualifikimit. Procesi i tij i vetingut po kryhet nga trupa e përbërë nga Roland Ilia, Suela Zhegu dhe Genta Tafa Bungo.
Petraq Çuri e ka nisur karrierën si avokat në fillim të viteve ’90 dhe ka punuar në avokati deri në vitin 2010, kur u emërua gjyqtar. Prej vitit 2010, ai e ushtron funksionin e gjyqtarit në gjykatën e rrethit Durrës.
Në vitin 2017, Inspektoriati i Këshillit të Lartë të Drejtësisë nisur një hetim disiplinor ndaj gjyqtarit Petraq Çurri, pas vendimit të tij të diskutueshëm për lirimin nga “masa e arrestit” të Alket Hatisë, i kërkuar asokohe nga Italia për akuzën e trafikut të drogës. Ministria e Drejtësisë kërkoi shkarkimin e tij nga detyra, por kërkesa u rrëzua nga ish-Këshilli i Lartë i Drejtësisë.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet pasurinë familjare të deklaruar nga gjyqtari Petraq Çuri nga viti 2010 deri në fund të vitit 2019. [Kliko për skedën në PDF]
Në deklarimin për herë të parë në vitin 2010, gjyqtari Petraq Çuri deklaronte pasuri me vlerë 44.3 milionë lekë, ndërsa në fund të vitit 2019, pasuria e tij familjare kap vlerën e 77.9 milionë lekëve.
Ai zotëron familjarisht pasuri të patundshme me vlerë 43.9 milionë lekë, likujditete bankare prej 29.1 milionë lekësh, automjete me vlerë 3.8 milionë lekë dhe kursime në cash prej 1 milion lekësh.
Të ardhurat familjare për periudhën e deklarimit janë 56 milionë lekë, nga të cilat gati 20% kanë si burim pagën e subjektit, rreth 45% pagën e familjarëve, 18% nga shitja e pasurive të paluajtshme dhe gati 13% nga qiratë.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 10 vite të deklarimit, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi disa “flamuj të kuq”, të cilët lidhen me mungesën e vlerës së të ardhurave me burim avokatinë si dhe përfitimin e disa pronave të paluajtshme nga ana e familjarëve përmes dhurimit.
Subjekti Petraq Çuri në deklarimin Para Fillimit të Detyrës deklaron një pasuri me vlerë rreth 44,000,000 lekë dhe burimi i deklaruar është ‘Veprimtari private e avokatit nga muaji mars 1993 deri në prill 2010’, pa dhënë vlerën e të ardhurave.
Në vitin 2011, bashkëshortja e subjektit deklaron dy apartamente banimi – për të cilat nuk jepet vlera dhe nuk është e qartë mënyra e përfitimit. Në të njëjtin vit, vajza e subjektit deklaron përfitimin e dy njësive dyqan dhe një garazh, përfituar nga kontrata e sipërmarrjes në emër të gjyshes.
Në vitin 2013, deklarohet në emër të bashkëshortes tokë bujqësore në fshatin Dhërmi, Vlorë, pjesë zotëruese ideale e pandarë 1/6, sip 8860 m2, e paregjistruar në ZVRPP Vlorë, dhuruar nga nëna.
Një vit më vonë, vajza deklaron pronësinë e një apartamenti 1 + 1 me sip 62.8 m2 fituar me kontratë dhurimi të datës 29 mars 2014.
Deklarata Para Fillimit të Detyrës
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Deklarata e pasurisë së vitit 2019
Për më shumë dokumente vizitoni databazën tonë dokumente.reporter.al
