Zgjedhje 2023, rezultatet Bashkia Elbasan dhe anëtarët e Këshillit Bashkiak (Infografik)

Zgjedhjet e 14 majit në Bashkinë e Elbasanit i dhanë kandidatit të Partisë Socialiste Gledian Llatja mbi 36 mijë vota ose 56.38% të votave të vlefshme ndërsa kandidati i koalicionit Bashkë Fitojmë në opozitë Luçiano Boçi fitoi 28 mijë vota ose 43.62%. Pjesëmarrja në Elbasan ishte vetëm 38%, gjë që sugjeron se së paku 17 mijë qytetarë që patën marrë pjesë në zgjedhjet e vitit 2021, refuzuan të marrin pjesë këtë herë. Votat mangut i përkasin pothuajse njësoj kandidatit të qeverisë dhe kandidatit të opozitës si dhe “të tjerëve”. Kështu, Llatja mori rreth 5,500 vota më pak nga sa kishin fituar në Elbasan Partia Socialiste dhe Partia Socialdemokrate në vitin 2021, ndërsa Boçi mori rreth 5700 vota më pak nga sa kishin fituar sëbashku Partia Demokratike dhe Lëvizja Socialiste për Integrim në zgjedhjet e përgjakura të atij viti.

Në zgjedhjet për këshillin bashkiak, PS mori 50% të votave dhe 28 mandate nga 51 anëtarët e këshillit. Bashkë Fitojmë mori 22.5% të votave dhe 12 mandate ndërsa Partia Demokratike mori 13% të votave dhe 7 mandate. Partia Demokracia Sociale, Partia Socialdemokrate, Partia Drejtësi, Integrim dhe Unitet dhe Partia e Gjelbër morën nga një mandat secila.