Zgjedhje 2023, rezultatet Bashkia Fier dhe anëtarët e Këshillit Bashkiak (Infografik)

Qytetarët e Fierit hodhën 19 mijë vota më pak nga sa kishin hedhur në zgjedhjet e vitit 2021 në garën e 14 majit për pushtetin vendor, por ndryshe nga shumë bashki të tjera, Partia Socialiste ruajti atje një rezultat të konsiderueshëm, duke pësuar vetëm një rënie të lehtë në krahasim me zgjedhjet parlamentare. Kandidati i saj Armando Subashi, një ish-gjyqtar dhe deputet i cili u zgjodh kryebashkiak për herë të parë në vitin 2015, fitoi të dielën 35 mijë vota, nga gati 37 mijë që patën fituar bashkërisht Partia Socialiste dhe Partia Socialdemokrate në vitin 2021. Nga ana tjetër, dy kandidatët e opozitës, Edvar Kodheli për koalicionin Bashkë Fitojmë dhe Eriselda Çelaj për Partinë Demokratike zyrtare morën sëbashku më pak se 16 mijë vota, ose gati 15 mijë vota më pak nga sa kishin marrë Partia Demokratike dhe Lëvizja Socialiste për Integrim në zgjedhjet parlamentare të vitit 2021. Pjesëmarrja në Bashkinë e Fierit ishte vetëm 32%.

Në suksesin e socialistëve në Fier duket se ka luajtur një kontribut jo të vogël edhe Partia Socialdemokrate, e cila mbështet socialistët në parlament në një aleancë informale. PSD, e drejtuar nga politikani i sanksionuar nga amerikanët Tom Doshi, fitoi në Fier 4,670 vota dhe 5 mandate për këshilltarë, në këshillin me 51 vende. Në zgjedhjet e vitit 2021, PSD pati fituar vetëm 307 vota ndërsa me rezultatin e 14 majit në bashkinë Fier dhe në bashkitë e tjera të qarkut me të njëjtin emër, ajo duket e pozicionuar për të fituar së paku një mandat deputeti në zgjedhjet parlamentare të vitit 2025.

Partia Socialiste fitoi 58% të votave për këshill dhe 33 mandate ndërsa koalicioni Bashkë Fitojmë mori 13% të votave dhe 7 mandate. Partia Demokratike zyrtare mori 8% të votave dhe 4 mandate ndërsa Aleanca Liberale e Djathtë dhe Partia Drejtësi, Integrim dhe Unitet fituan nga një mandat secila. Siç vërehet, Partia Socialdemokrate rezulton forca e tretë në këshillin e bashkisë Fier pas Partisë Socialiste dhe koalicionit Bashkë Fitojmë.

Kjo është lista e anëtarëve të këshillit të Bashkisë Fier për mandatin 2023-2027.