Me shumicë votash, deputetët socialistë miratuan ndryshimet e qeverisë, duke votuar dekretet e presidentit Bajram Begaj për shkarkimin e ministres së Jashtme, Olta Xhaçka, asaj të Bujqësisë, Frida Krifca dhe të Arsimit, Evis Kushi si dhe 2 ministreve pa portofol; Edona Bilali dhe Milva Ikonomi.
Kundër shkarkimit të Xhaçkës votoi vetëm deputeti Erjon Braçe.
Ogerta Manastirliu la ministrinë e Shëndetësisë për të marrë portofolin e Ministres së Arsimit. Gjithashtu, socialistët votuan pro emërimit të Igli Hasanit në krye të Ministrisë së Jashtme, Aila Denajt te Bujqësia, Albana Koçiut te ministria e Shëndetësisë dhe Arbjan Maznikut në një dikaster të ri pa portofol për pushtetin vendor.
Dekreti për emërimin e Ervin Metes në krye të ministrisë së Financave dhe kalimi i Delina Ibrahimajt nga kjo ministri në një ministri pa portofol për Sipërmarrjen votohen në seancën e radhës të enjten.*
Deputetët e opozitës votuan kundër emërimeve të reja, ndërsa kryeministri Edi Rama nuk ishte i pranishëm në seancën e votimit.
Pas seancës parlamentare, kreu i grupit parlamentar të PD, Gazmend Bardhi denoncoi mungesën e debatit.
“Shqiptarët e kanë kuptuar që sado makiazh të bëjë të kabinetit, vulën e korrupsionit nuk e heq dot. Problemi i kësaj qeverie nuk janë anëtarët e kabinetit, por Rama,” deklaroi Bardhi.