Në dokumentin e negociuar me vetëm 3 paragrafë, Kuvendi i Shqipërisë deklaron mbështetjen me rezolutën e miratuar më 28 shtator në Kuvendin e Kosovës, u kërkon institucioneve që të angazhohen me partnerët ndërkombëtare për një hetim ndërkombëtar për aktin terrorist si dhe inkurajon qeverinë e Kosovës që të bashkëpunojë me aleatët për normalizimin e marrëdhënieve me Serbinë.
Pas disa orë debatesh, ku opozita akuzoi qeverinë dhe kryeministrin Edi Rama se nuk kishte mbajtur qëndrimin e duhur për sulmin terrorist, 101 deputetë votuan pro, asnjë kundër dhe 1 abstenim. Vota abstenuese ishte e deputetit të PD-së, Kreshnik Çollaku, pasi amendamentet e propozuara prej tij nuk u hodhën fare në votim.
Kryeministri Rama nuk ishte i pranishëm në votim, por gjatë një interpelance në nisje të seancës vuri në pikëpyetje nevojën për një akt të tillë.
“Po Kuvendi i Shqipërisë, vend anëtar i NATO-s, vend kandidat që negocion anëtarësimin në BE, vend i cili ka ulësen, ka të gjitha rrugët e komunikimit institucional me botën demokratike, ka ambasadorët e vet në të gjitha organizmat e politikës ndërkombëtare, kujt ia drejton një rezolutë si ajo që na u propozua?” tha Rama.
Kritika ndaj rezolutës pati nga deputetë të opozitës.
Kryetarja e komisionit të Integrimit, Jorida Tabaku, e cilësoi të vakët dhe pa guxim përmbajtjen e tekstit të rezolutës dhe jo në lartësinë e detyrimit kushtetues të vendit për bashkëkombësit në Kosovë.
“Parlamenti i Shqipërisë duhet të buçasë për Kosovën, si mund të fshihet pas rezolutës së Kosovës. Akt kriminal i një njësie terroristësh serbe, thoni në preambulë. Kaq? Po këtë e thotë edhe Vuçiç. Po aq sa opozita serbe s’kemi ne kurajë të themi që Vuçiç është përgjegjës,” tha Tabaku në fjalën e saj në seancën plenare.
Ndërkohë, ministri i Jashtëm, Igli Hasani tha se: “Kosova ka qenë dhe mbetet në qendër të aktivitetit diplomatik shqiptar” dhe shtoi se javën e ardhshme do të organizohet në Këshillin e Sigurimit një takim kushtuar pandëshkueshmërisë së krimeve gjatë konfliktit në Kosovë.
Ish- kryeministri Sali Berisha mbështeti rezolutën, por akuzoi Ramën se po mbronte interesat e Serbisë dhe se “ bllokonte çdo lloj përpjekje që mund të bëhej për ndonjë hap pozitiv në drejtim të klimës midis Serbisë dhe Kosovës”.
