Demokratët hodhën tymuese dhe thirrën në kor “turp” ndërsa socialistët votonin.
Situata e tensionuar vijon prej disa ditësh, pasi deputetët e Partisë Demokratike po tentojnë të bllokojnë zhvillimin normal të seancave plenare apo të mbledhjeve të komisioneve parlamentare.
“Opozita nuk mund të pranojë kurrë të qendrojë në parlament si një fasadë pluralizmi për interesa të Edi Ramës”- tha për mediat ish-kryeministri Sali Berisha. Ai po ashtu pretendoi se në sallë kishte disa nga punonjësit e Gardës së Republikës që kujdesen për sigurinë në Kuvend ishin të armatosur.
Në një reagim për mediat Garda e Republikës tha se asnjë prej punonjësve të saj, -“siç parashikon baza ligjore në fuqi, nuk ka qenë i pajisur me armë zjarri brenda sallës ku zhvillohen punimet”.
Pas seancës drejtori i policisë së Tiranës, Tonin Vocaj, i shoqëruar nga një grup policësh mbërriti në godinën e Kuvendit, por një zëdhënës i ministrisë së Brendshme i tha BIRN-it se nuk kishte informacion për arsyen e ardhjes së tij.
Deputetët opozitarë vendosën të përdorin mjete jo parlamentare pasi në mazhoranca rrëzoi kërkesën e opozitës për ndryshimin e përbërjes së Komisionit të Reformës Zgjedhore, si dhe 2 kërkesa për ngritjen e komisioneve hetimore për kontratat konçensionare në shëndetësi dhe rrjedhjen e të dhënave nga sistemi TIMS.
Në seancën e mëparshme të hënën dy deputetë u konfrontuan fizikisht dhe grupi Parlamentar Socialist ndërmorri një kallëzim penal ndaj deputetit të PD-së Bledjon Nallbati për ushtrim dhune ndaj socialistit Vullnet Sina.
Ndërsa të mërkurën socialistët e thirrën mbledhjen e Komisionit të Ekonomisë online për të diskutar buxhetin e qeverisë për vitin 2024 dhe Paketën Fiskale.
