Gjykata e Posaçme e Apelit rrëzoi të martën më 14 nëntor kërkesën e zyrtarit të Kadastrës së Sarandës, Saimir Braho, i dënuar në shkallën e parë për korrupsion pasiv për rishqyrtim gjyqësor të çështjes. Kryetarja e trupit gjykues, Daniela Shirka deklaroi se gjykata nuk e kishte vlerësuar të arsyeshëm rishqyrtimin gjyqësor të çështjes dhe për këtë arsye nuk e pranoi. Në vijim, gjykata ftoi palët të paraqesin konkluzionet përfundimtare, por avokati i të pandehurit Saimir Braho kërkoi kohë me pretendimin se do të parashtronin edhe lidhur me vendimin e ndërmjetëm të gjykatës për rrëzimin e kërkesës, si dhe se në këto kushte do t’i duhej që të konsultohej me të përfaqësuarin prej tij.
Avokatët e tre të pandehurve të tjerë paraqitën konkluzionet. Mbrojtësi i Laert Pashës, nëpunësit tjetër i Kadastrës së Sarandës, i akuzuar për korrupsion në procesin e regjistrimit të pronave, u shpreh se e kishin pranuar fajësinë. Por, ai kundërshtoi kualifikimin e veprës penale, duke pretenduar se Pasha mund të akuzohet vetëm për ushtrim të ndikimit të paligjshëm dhe jo për korrupsion, pasi nuk provohet bashkëpunimi.
Mbrojtësi i të pandehuit Hamza Tola i cilësoi provat e prokurorisë të pamjaftueshme për ta shpallur fajtor të përfaqësuarin prej tij. Sipas mbrojtësit të Tolës, akuza e ngritur ndaj klientit të tij nuk lidhet me episodin korruptiv për të cilin akuzohen zyrtarët e Kadastrës së Sarandës. Ai argumentoi se Tola jo vetëm që se ka kryer veprën penale të ushtrimit të ndikimit tek nëpunësit e Kadastrës së Sarandës, por as nuk mundej ta kryente një gjë të tillë, pasi ai punonte si shofer në Ministrinë e Drejtësisë dhe nuk kishte asnjë lidhje. Pretendimet dhe deklarimet e kallëzuesit dhe të pandehurit Kastriot Kreku se i ishte sygjeruar pagesa në këmbim të certifikatës së pronës, u cilësuan prej Tolës dhe avokatit të tij në mospërputhje me njëra-tjetrën.
Ndërsa mbrojtësi Kastriot Krekut, u shpreh se duhej të kryente mbrojte të trefishtë, nga gjykata, prokuroria dhe prej kolegëve. Sipas tij, Kreku ka kryer kallëzim për shkak të vështirësive që kishte hasur në legalizimin e objektit të tij. Ai parashtroi se Kreku jetonte në Angli prej vitesh dhe kur i ishte kërkuar shuma prej 3000 euro, kishte kujtuar se ishte taksa për procesin e legalizimit të objektit. Avokati u shpreh se kur Kreku e kishte kuptuar se bëhej fjalë për ryshfet, i ishte drejtuar SPAK-ut me kallëzim penal dhe pasi kishte pritur disa muaj pa përgjigje, e kishte denoncuar situatën pranë emisionit “Stop”.
Prokurori Elvin Gokaj kërkoi që konkluzionet t’i paraqesë pasi të njihet me bisedimet përfundimtare të të gjithë të pandehurve. Për rrjedhojë gjykata vendosi të shtyjë seancën më datë 20 nëntor, në orën 14:00. Duke e vlerësuar të padrejtë kërkesën e avokatit të Brahos për shtyrje, gjykata vendosi të pezullojë afatet e masave të sigurimit personal për të pandehurit.
Në maj të vitit 2022, Policia e Shtetit njoftoi se pas transmetimit në emisionin investigativ “Stop”, të denoncimit të një rasti korruptiv në ASHK Sarandë, u krye ndalimi i 41-vjeçarit Laert Pasha për veprën penale “Korrupsioni pasiv i personave që ushtrojnë funksione publike”. Në regjistrimin video të publikuar, Pasha shfaqej teksa merrte një shumë parash kundrejt premtimit për regjistrimin e një prone. Në vijim të hetimeve u ngritën akuza dhe për dy të pandehurit e tjerë, si dhe ndaj vetë kallëzuesit Kastriot Kreku, pasi për këtë të fundit u urdhërua nga gjykata.
