Gjykata e Posaçme e Shkallës së Parë pranoi të mërkurën më 10 janar kërkesën ish-zyrtarit të Ministrisë së Mjedisit, Pëllumb Abeshi për shuarjen e masës së sigurimit personal “arrest në burg”, të caktuar ndaj tij më 27 mars të vitit 2022 për akuzën “shpërdorim detyre” lidhur me aferën e incineratorit të Elbasanit.
Në përfundim të gjykimit të kërkesës së Abeshit, trupi gjykues i përbërë nga gjyqtaret Elsa Ulliri, Irena Gjoka dhe Flora Hajredinaj, ka vendosur shuarjen e masës së sigurisë, me argumentin se kohëzgjatja e paraburgimit të vuajtur është më e madhe se masa e dënimi të caktuar. Abeshi u dënua më 5 tetor 2023 me 2 vjet e 8 muaj heqje lirie për këtë çështje.
Po ashtu, Abeshi u dënua me 2.4 vjet burgim për skemën korruptive të incineratorit të Fierit dhe gjendet nën akuzë dhe në masën e sigurimit personal “arrest shtëpie” lidhur me aferën tjetër të incineratorit të Tiranës.
Skandali i incineratorëve nisi në vitin 2014 me një vendim të qeverisë për të shpallur një emergjencë mjedisiore, si justifikim për të dhënë koncesionin e incineratorit të Elbasanit. I njëjti grup kompanish mori më pas koncesion për incineratorin e Fierit dhe atë të Tiranës. Dy dyzina me zyrtarë dhe biznesmenë janë arrestuar ose janë shpallur në kërkim për çështjen, përfshirë ish-ministrin e Mjedisit, Lefter Koka dhe ish-deputetin socialist Alqi Bllako. Ky i fundit u shpall i pafajshëm në gjykimin për incineratorin e Elbasanit.