Komisioni i Ankimimeve dhe Sanksioneve shpalli të premten vendimin për masa administrive për keqpërdorim të fondeve ndaj Partisë Socialiste dhe Partisë Demokratike dhe kandidatëve të tyre në zgjedhjet e pjesshme vendore të marsit 2022.
Sipas vendimit u gjobitën në vlerën 100 000 lekë personat përgjegjës për financat në të dy partitë kryesore, ndërkohë që PD mori dhe një gjobë tjetër në vlerën 750 000 lekë si subjekt zgjedhor.
Partitë u gjobitën në bazë të nenit 173 për mosparaqitje të një raporti financiar për fushatën brenda afatit ligjor dhe shkelje të dispozitave për financimin e fushatës zgjedhore.
Masa administrative u morën dhe ndaj kandidatëve për kryetarë bashkie, në vlerën 92.775 lekë ndaj Emirjana Sakos, kryebashkiake e Durrësit, 120.590 lekë ndaj Edison Memollës, kandidat i PS-së për Rrogozhinën dhe 91.420 lekë ndaj Bardh Spahisë, kandidat për kryetar bashkie i koalicionit “Shtëpia e Lirisë” për bashkinë Shkodër.
Gjobat ndaj kandidatëve u bazuan në pikën 5 të nenit 173 të Kodit Zgjedhor që ndalon pranimin e fondeve private më vlerë më të madhe se 50 mijë lekë përmes formave të tjera, të ndryshme nga kalimi në llogarinë bankare. Sipas këtij neni ky veprim dënohet me një gjobë të barabartë me shumën e dhuruar dhe kalimin e fondeve të marra për llogari të KQZ-së.
Pas konstatimeve të organizatës KRIIK, KQZ verifikoi raportet financiare te kandidatëve dhe konstatoi se këta kandidatë i kanë dhuruar vetes shumat e mësipërme në formë cash.
