Gjykata e Posaçme e Apelit njoftoi të premten se ka lënë në fuqi një vendim dënimi ndaj gjyqtares Zamira Vyshka e akuzuar për korrupsion pasiv, avokatit Ilir Pashaj dhe dy personave të tjerë Taulant Ramollari dhe Xhulio Musaj që akuzohen për “Korrupsioni aktiv të gjyqtarit, prokurorit dhe i funksionarëve të tjerë të drejtësisë”, kryer në bashkëpunim.
Katër të dënuarit u arrestuan në korrik 2022 dhe u dënuan nga Gjykata e Posaçme e Shkallës së Parë për akuzat e korrupsionit në korrik 2023. Gjyqtarja Vyshka u dënua me 3 vjet burgim, por gjykata mori parasysh gjykimin e shkurtuar që e reduktoi dënimin në 2 vjet. Gjykata po ashtu vendosi ta pezullojë dënimin dhe ta vërë Vyshkën në shërbim prove. Vyshka po ashtu ndalohet të kryej funksione publike për 5 vjet.
Ndërkohë avokati Pashaj u dënua me 1.4 vjet burg që u konsideruan të shlyera me kohën e paraburgimit. Të njëjtin dënim mori edhe Taulant Ramollari, ndërsa Xhulio Musaj u dënua me 6 muaj, po ashtu të shlyer me kohën e paraburgimit.
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Daniela Shirka (kryesuese), Dhimitër Lara (anëtar) dhe Florjan Kalaja (anëtar), vendosi të lërë në fuqi dënimet e dhëna nga shkalla e parë. “Lënien në fuqi të vendimit nr. 45, datë 04.07.2023, të Gjykatës së Posaçme të Shkallës së Parë për Korrupsionin dhe Krimin e Organizuar”, thuhet në vendim.
Hetimet e SPAK gjetën se gjyqtarja Vyshka, që shërbente si gjyqtare në Gjykatën e Elbasanit kishte pranuar nga të afërmit e një personi të arrestuar një shumë parash. Prokuroria po ashtu provoi përfshirjen e avokatit në këtë proces. “Fakti penal i hetuar, lidhet me një rast të korrupsionit aktiv/pasiv në sistemin e drejtësisë (në qytetin e Elbasanit), ku persona të interesuar/familjarë të një shtetasi të arrestuar në bashkëpunim me avokatin mbrojtës, i kanë ofruar gjyqtarit të çështjes një shumë monetare me qëllim favorizimin në caktimin e masës së dënimit”, ka njoftuar më herët SPAK.