Gjykata Ndërkombëtare e Drejtësisë në Hagë vendosi të premten se Izraeli duhet të parandalojë çdo shkelje të Konventës së Gjenocidit dhe të garantojë “me efekt të menjëhershëm” që trupat e tij të mos kryejnë asnjë akt gjenocidal në Rripin e Gazës.
GJND-ja tha se Izraeli duhet “të marrë të gjitha masat brenda fuqisë së tij për të parandaluar kryerjen e të gjitha akteve” që bien nën Nenin 2 të Konventës së Gjenocidit të vitit 1948 kundër Palestinezëve në Gazë.
Këto përfshijnë “vrasjen e anëtarëve të grupit (palestinezëve), shkaktimin e lëndimeve të rënda trupore ose mendore për anëtarët e grupit, shkaktimin e qëllimshëm të dëmtimeve të llogaritura të grupit për të sjellë shkatërrimin e tij fizik tërësisht ose pjesërisht dhe vendosjen e masave që synojnë të parandalojnë lindjet brenda grupit”.
Afrika e Jugut e kundërshtoi çështjen në GJND, duke pretenduar se Izraeli shkeli Konventën e Gjenocidit gjatë operacionit ushtarak që nisi në Gazë pasi grupi militant Hamas sulmoi Izraelin në tetor.
Afrika e Jugut i kërkoi GJND-së të vendoste një sërë masash të përkohshme ndaj Izraelit, duke filluar me pezullimin e operacionit të tij ushtarak.
Izraeli i kërkoi gjykatës ta refuzonte kërkesën, duke thënë se “është Izraeli dhe qytetarët e tij që do të rrezikonin dëm të pariparueshëm nëse kërkesa e Afrikës së Jugut do të pranohej”. Ai i hodhi poshtë pretendimet e gjenocidit si “të pabaza”.
Ndërsa GJND-ja hodhi poshtë kërkesën e Izraelit për ta rrëzuar çështjen, ajo nuk bëri thirrje për përfundimin e operacionit ushtarak në Gazë, siç kishte kërkuar Afrika e Jugut.
Vendimi i GJND-së thoshte se Izraeli duhet “të marrë të gjitha masat brenda fuqisë së tij për të parandaluar dhe ndëshkuar nxitjen e drejtpërdrejtë dhe publike për të kryer gjenocid në lidhje me anëtarët e grupit palestinez në Rripin e Gazës”.
Izraeli duhet gjithashtu “të marrë masa të menjëhershme dhe efektive për të garantuar ofrimin e shërbimeve bazë të nevojshme urgjentisht dhe ndihmës humanitare për të adresuar kushtet e pafavorshme të jetës me të cilat përballen palestinezët në Rripin e Gazës”.
GJND-ja më tej urdhëroi Izraelin që të “marr masa efektive për të parandaluar shkatërrimin dhe për të siguruar ruajtjen e provave në lidhje me pretendimet për akte që përfshihen në Nenin 2 dhe Nenin 3 të Konventës për Parandalimin dhe Dënimin e Krimit të Gjenocidit kundër anëtarëve të grupit palestinez në Rripin e Gazës”.
Ajo tha se Izraeli duhet “të paraqesë një raport mbi të gjitha masat e marra për të vënë në fuqi këtë urdhër brenda një muaji nga data e urdhrit”.
Përpara se të shpallte masat e vendosura ndaj Izraelit, presidentja e GJND-së, gjyqtarja Joan Donoghue vuri në dukje se “në fazën e tanishme të procedurës, gjykatës nuk i kërkohet të konstatojë nëse ka ndodhur ndonjë shkelje e detyrimeve të Izraelit sipas Konventës së Gjenocidit”.
“Një konstatim i tillë mund të bëhet vetëm nga gjykata në fazën e shqyrtimit të bazueshmërisë së çështjes aktuale”, shtoi Donoghue.
Lidershipi izraelit ka argumentuar se operacionet e tij ushtarake po synojnë në mënyrë legjitime Hamasin, i cili kontrollon Gazën, pas sulmit të armatosur të tetorit në Izraelin jugor, në të cilin 1,200 njerëz u vranë dhe mbi 200 u morën peng.
Por Afrika e Jugut argumentoi se zyrtarët izraelitë kishin treguar qëllim gjenocidal në deklaratat e tyre për operacionin ushtarak në Gazë, ku mbi 26,000 palestinezë janë vrarë, mbi dy të tretat e tyre gra dhe fëmijë, sipas ministrisë së shëndetësisë.
