Komisioni parlamentar për Reformën Zgjedhore u mblodh të premten në platformën online Zoom, pasi mbledhja fizike u bllokua nga deputetët e opozitës në sallë me pretendimin se nuk janë të përfaqësuar siç u takon në përbërjen e këtij komisioni.
Gjatë mbledhjes online, ku morën pjesë përfaqësuesit e Partisë Socialiste dhe disa anëtarë të opozitës, u miratua kalendari i punimeve për muajt në vijim që do të kulmojnë me ndryshimin e Kodit Zgjedhor.
Sipas bashkëkryetarit socialist, Damian Gjiknuri, kalendari i punimeve adreson rekomandimet e ardhura nga OSBE/ODHIR dhe temat e përfshira lënë hapësirë për bashkëpunimin mes palëve politike, pasi janë parashikuar konsulta me të gjithë aktorët, partitë politike dhe grupet e interesit që kanë paraqitur një interes për reformën.
Ndërsa bashkëkryetari i opozitës, Enkelejd Alibeajt i kërkoi kryetares së Kuvendit që të mundësonte zhvillimin e mbledhjeve në formë fizike.
Pjesa tjetër e opozitës, me anë të një shkresë të firmosur nga 47 deputetë, kërkojnë riformatim të komisionit dhe zëvendësimin e Alibeajt me deputetin Oerd Bylykbashi.
Një kërkesë e mëparshme e tyre për këtë zëvendësim u rrëzua nga shumica socialiste në sesionin parlamentar të vjeshtës, duke u bërë një nga shkaqet për nisjen e protestave dhe tentativave për të bllokuar funksionimin normal të punës së Kuvendit.
Në një dalje për mediat, Bylykbashi tha se përfaqësia aktuale e opozitës ishte “paterica e Ramës”.
“Shqipëria nuk ka nevojë për një politikë të njëanshme që mbështetet mbi paterica,” tha ai duke akuzuar PS-së se nuk kërkon “një reformë zgjedhore konsensuale me një komision bipartizan që funksionon mbi bazën e konsensusit”.
Ndërsa bashkëkryetari socialist, Damian Gjiknuri tha se nuk e kuptonte bllokimin e punës së Komisionit nga ana e opozitës.
“Komisioni është gjithëpërfshirës, është ngritur nën frymën e përfaqësimit të rrymave politike që janë në Kuvend. Asnjë zë aty nuk është i papërfaqësuar,” pretendoi ai në një dalje për mediat pas mbledhjes online.
Ai ftoi gjitha palët opozitare të vijnë me propozime, sepse sipas tij ajo duhet të jetë e interesuar për reformën. “PS mund të jetë edhe e qetë me këtë kod Zgjedhor, pasi jemi parti në pushtet dhe kemi një kod të aprovuar nga ODIHR,” tha Gjiknuri.
Komisioni për Reformën Zgjedhore është ngritur thuajse 2 vjet më parë, por nuk ka prodhuar asnjë rezultat konkret dhe vetëm ka kërkuar shtyrjen e afatit çdo 6 muaj në Kuvend. Ndërkombëtarët kanë apeluar që reforma zgjedhore të bëhet me dialog politik dhe të jetë gjithëpërfshirëse.