Prokuroria e Posaçme kundër Korrupsionit dhe Krimit të Organizuar njoftoi të hënën se kishte pranuar kërkesën e prokurorisë për të kaluar për gjykim çështjen ndaj 20 personave të akuzuar si të përfshirë në një sërë vrasjesh dhe atentatesh dhe si pjesë e një organizate kriminale.
“Dërgimin në gjyq të çështjes penale Nr. 75/2, viti 2022 në ngarkim të të pandehurve Nuredin Dumani, Henrik Hoxha, Skerdi Tasi, Enver Diva, Besian Xhixha, Erion Alibej, Florenc Çekrezi, Elvis Koçi (Çaushllari), Ilirian Feci, Asllan Plaku, Ardian Uzuni, Altin Ndoci, Gentian Sharra, Agron Qoli, Petrit Qoli, Fatos Gosa, Agron Qafa, Agim Gjini, Xhulian Hoxha dhe Albert Pashaj”, thuhet në njoftimin e nisur nga gjykata.
Gjykata pushoi përkohësisht hetimet për Talo Çelën, duke bërë me dije se çështje do të rimerrej në një kohë të dytë.
Lista e krimeve të renditura në vendimin e pranimit të kërkesës për gjykim, përfshin vrasjen me pagesë të Fatmira Habili në vitin 2013 në qytetin e Durrësit, vrasjen e Emiljano Ramazanit në vitin 2020 në Elbasan, vrasjen e Bujar Çelës, në vitin 2020 po në në Elbasan, vrasjet e Filip Gjeloshit, Elvis Dedajt, Besmir e Viktor Haxhias, Dorjan Shkozës dhe Anxhelo Avdias. Po ashtu në akuzë janë një sërë atentatesh, përfshi ato ndaj Indrit Dokles, Talo Çelësh, Sokol Sanxhaktarit dhe Elton Kilës.
Organizata po ashtu hetohet për vjedhje me dhunë, shkatërrim prone me eksploziv dhe një sërë krimesh të tjera përfshi atë të dhunë në familje. Nuredin Dumani, i njohur në media si i penduari i drejtësisë, kryeson listën e të akuzuarve bashkë me një sërë personash të tjerë të njohur të botës së krimit.
Një pjesë e të akuzuarve janë të arrestuar që prej majit 2022, ndërsa të tjerë përfshi disa prej drejtuesve të organizatës janë prej vitesh në kërkim. Çështja e ngritur bazuar mbi rrëfimin e një të akuzuari për vrasje me pagesë, është një nga më të mëdhatë që SPAK çon në gjykatë kundër krimit të organizuar.